Жижиг, дунд үйлдвэр, үйлчилгээнд цахим шийдлийг нэвтрүүлнэ

Жижиг, дунд үйлдвэр, үйлчилгээний салбарт дэвшил авчрах, цахим шийдлүүдийг нэвтрүүлэхээр Нийслэлийн Жижиг, дунд үйлдвэр, үйлчилгээг дэмжих төв НӨҮГ, Нийслэлийн Бизнес инновац хөгжлийн газар Голомт банктай хамтран “DIGITAL SME 2023” арга хэмжээг зохион байгууллаа. Тодруулбал, үр ашгийг нэмэгдүүлж, цаг хугацаа, өртөг хэмнэх технологийн дэвшил, цахим хэрэглээг жижиг, дунд бизнес эрхлэгчдийн үйл ажиллагаанд нэвтрүүлэх, төр, хувийн хэвшлийн хамтын ажиллагааны бодит үр дүнг гаргахад энэхүү арга хэмжээний зорилго оршиж буй юм.

Энэ хүрээнд “Нийслэлийн жижиг, дунд үйлдвэр, үйлчилгээний салбарт дижитал шилжилт хөгжүүлэх хэрэгцээ шаардлага”, “DIGITAL SME’s” буюу нийслэлийн жижиг, дунд үйлдвэр, үйлчилгээний салбарт дижитал систем хөгжүүлэх шийдэл” зэрэг сэдвээр илтгэл хэлэлцүүлж, “TomYo EdTech”, “Зочил” платформын давуу тал, инновацыг танилцуулсан.

Нийслэлийн Жижиг, дунд үйлдвэр, үйлчилгээг дэмжих төв НӨҮГ-ын дарга Г.Гангамөрөн:

-Жижиг, дунд үйлдвэрлэгчид үйл ажиллагаандаа цахим шийдлүүдийг нэвтрүүлэх нь чухал байна. Нийслэлийн хэмжээнд жижиг, дунд үйлдвэр, үйлчилгээ эрхэлж байгаа 678 мянган иргэн, 43 мянган аж ахуйн нэгжийнхээ мэдээллийг өөрсдийнх нь зөвшөөрлийн дагуу цахим платформ дээр нэгтгээд нэг жилийн хугацаанд сегментчилнэ. Өөрөөр хэлбэл, аль салбарын ямар бүтээгдэхүүнийг олон улсын зах зээлд гаргах боломжтой вэ, ямар чиглэлд дижитал хэрэглээг нэвтрүүлснээр эдийн засгийн үр өгөөжтэй байх вэ, хүний нөөцийг хэрхэн чадавхжуулах вэ гэдгийг тодорхойлох юм. Энэ платформ ашиглалтад орсноор жижиг, дунд үйлдвэрлэгчдийн үйл ажиллагааг дэмжих, тэдэнд хэрэгтэй үйлчилгээг хүргэх, цаашлаад бизнесийнхээ түүхээр зээл авах, хөрөнгө оруулалт татах зэрэг үйл явц илүү хялбар болох юм хэмээв.

Нийслэлийн Бизнес инновац хөгжлийн газрын дарга Б.Бат-Өлзий:

-Орчин цагт дижитал шилжилт хийсэн компаниуд хөгжиж, эсвэл зах зээлдээ тэсэж үлдэж байна. Монголын томоохон компаниудын хувьд үүнийг амжилттай хийж буй. Гэхдээ энэ шилжилтийг хийхэд их хэмжээний хөрөнгө, цаг хугацаа шаардлагатай учраас  жижиг, дунд үйлдвэрлэлийн хувьд энэ тал дээр хоцорч байна. Тэгэхээр бид энэ салбарт цахим шилжилт хийхийн тулд мэдээллийн нэгдсэн санг бий болгохоор төлөвлөөд ажлаа эхэлсэн гэсэн юм.

Голомт банкны Байгууллага хөгжлийн газрын захирал А.Ганчимэг:

-Манай  банк жижиг, дунд үйлдвэрлэгч харилцагчдадаа зөвхөн бүтээгдэхүүн, үйлчилгээ хүргээд зогсохгүй тэдэнд тулгамдаж буй асуудлыг шийдэхэд нь туслах, дараагийн шатанд гарахад нь нэмэр болох менторшип хөтөлбөрүүдийг хэрэгжүүлдэг. Цаашид энэ салбарт цахим хэрэглээг нэмэгдүүлэхэд юу хийж болох вэ, ямар боломж, гарц байна вэ гэдгийг өнөөдөр хэлэлцэж байна. Эхний ээлжид бид жижиг, дунд үйлдвэрлэгчдийн өгөгдөл дээрээ суурилаад платформ хөгжүүлэхийг зорьж байгаа хэмээлээ.

Нийслэлийн Жижиг, дунд үйлдвэр үйлчилгээг дэмжих төв НӨҮГ-аас  энэхүү арга хэмжээг жил бүр зохион байгуулж, инновац шингэсэн бүтээгдэхүүнийг олон улсын зах зээлд гаргах, төрийн худалдан авалтаар дэмжих, аж ахуйн нэгжүүдийн хамтын ажиллагааг өргөжүүлэх юм. Түүнчлэн ЖДҮҮ салбарт дижитал шийдлийг нэвтрүүлэх чиглэлд хамтран ажиллахаар оролцогч талууд Санамж бичиг байгуулав.

Эх сурвалж: НЗДТГ-ын хэвлэл мэдээлэл, олон нийттэй харилцах хэлтэс