“Ил-76” онгоцны нисгэгчид ТОСГОНЫГ авраад өөрсдөө АМИА АЛДЖЭЭ

Украины олзлогдсон цэргүүдийг тээвэрлэж явсан ОХУ-ын Зэвсэгт хүчний “Ил-76” онгоцыг Белгород мужийн нутаг дэвсгэрт унагасан хэрэг гарсан билээ.

Тус онгоц руу Украины цэргийнхэн пуужингаар харвасан гэж Оросын цэргийнхэн мэдээлсэн. “Ил-76” онгоцонд байсан Украины 65 олзны цэрэг, нисэх багийн 6 гишүүн болон дагалдаж явсан албаны 3 хүн бүгд амиа алдсан юм.

Тэгвэл “Ил-76” онгоцны нисгэгч нар агаарын хөлгийг унахаас өмнө хүн ам суурьшдаг бүсээс өөр тийш чиглүүлж чадсан байна. Запорожье мужийн захирагч Евгений Балицкий нисгэгч байсан хүний хувьд “Ил-76” онгоцны осолд дүгнэлт хийхдээ “Белгород мужид болсон ослын бичлэгүүдээс харахад нисгэгч нар онгоцоо тосгоноос өөр тийш чиглүүлсэн нь тодорхой харагдаж байна. Тэд онгоцыг зүүн доош тийш эргүүлж, илүү олон хүн амиа алдахаас хамгаалж чадсан” гэжээ.

ОХУ-ын Төрийн думаас “Ил-76” онгоцыг байшин барилга дээр унахаас хамгаалж чадсан нисгэгчдийн гавьяаг алдаршуулна гэсэн байна.

Оросын талаас өөрийн улсын олзны цэргүүд нь сууж яваа онгоц руу дайралт хийсэн Украины Зэвсэгт хүчнийг буруутгаж байгаа юм. Тус онгоц унах аюултай байсан Яблоново тосгоныхон амиа алдсан нисгэгчдийг тосгоныг авраад өөрсдөө амиа алдлаа хэмээн гавьяаг нь хүндэтгэж байгаа аж.

Украины талаас тухайн өдөр солилцооны олзны цэргүүдийг тээвэрлэх тухай мэдэж байсан гэнэ. Тэднийг Колотиловка шалган нэвтрүүлэх боомт дээр солилцох ёстой байжээ.