"Хувьсал"-ын "ХУВЬ ЗАЯА"

"Хувьсал" продакшны дэлгэцийн 8 дахь уран бүтээл болох " Хувь заяа" уран сайхны кино нээлтээ хийгээд удаагүй энэ цаг дор хамгийн их олны анхааралд өртсөн бяцхан жүжигчин У.Нартайгийн тухай дурьдахгүй өнгөрөхийн аргагүй.

У.Нартай"Хувьсал" продакшны кино уран бүтээлд тоглож үзэх битүүхэн хүсэлтэй явсан бөгөөд тус продакшн дэлгэцийн уран бүтээлдээ дүрийн сонгон шалгаруулалт явуулж байгаа сургаар очиж уулзан "Хувьсал" продакшнтай холбогдсон түүхтэй гэнэлээ. Ингэж У.Нартай охин Хувьзаяа охины дүрд сонгогдож, анхны гол дүрийн кино уран бүтээлдээ дүрээ мөнхөлсөн аж.
 

Охины талаар гавьяат жүжигчин У.Уранчимэг хэлэхдээ "У.Нартай бол хүн болгонд заяагаад байдаггүй байгалаас заяасан өгөгдөлтэй жүжигчин, насандаа баймгүй хэрсүү бөгөөд хамтдаа ажилласан уран бүтээлчдийгээ эерэг зөв зүйлд уриалж чаддаг. Магадгүй манай киноны дараа түүнд олон продакшнаас ажлын санал, жүжиг, кино, дуунд дүр бүтээх санал их ирэх байх гэдэгт огтхон ч эргэлзэхгүй байна" гэлээ. 
 

У.Нартай "Хувьзаяа охины дүр бол миний амьдрал дээр байдгаас тэс хөндлөн зөрж байсан. Илүү хүчирхэг, ганцаараа бүхнийг болгоод, бүтээгээд сурчихсан хэрсүү охины дүр байсан тул дүр дээрээ маш их ажилласан. Зураг авалт эхэлсэн үеэс л яг л гэр бүл шиг минь тусалж, дэмжсэн болохоор киноныхоо дүрийг амжилттай бүтээж чадсан гэж бодож байна" гэв.