УИХ-ын 126 гишүүний хоёр нь л сонин захиалжээ

УИХ-ын гишүүд, түүний зөвлөх, туслахууд тогтмол хэвлэл захиалахдаа хойрго болсон, Төрийн худалдан авалтын хэмнэлтийн хуулиар төрийн байгууллагуудын хэвлэл захиалгын мөнгийг хассан зэргээс шалтгаалан сонин хэвлэл уншдаг төрийн албан хаагч нүдний гэм болжээ.

Тэр хэрээрээ сошиалын мэдээг даган намирч барьцгүй аашилдаг болсон. Түүний жишээ гэвэл, УИХ-ын 126 гишүүнээс хоёрхон нь сонин захиалж, Төрийн ордны шуудангийн салбарт хайрцагтай болсон байна. Тэд бол УИХ-ын гишүүн Ч.Лодойсамбуу, Д.Энхтүвшин нар юм.

Бодит мэдээллийн эх сурвалж болсон тогтмол хэвлэлээ захиалан уншиж буй хоёр гишүүнд талархал илэрхийлье. Бусад гишүүд ч дөрөвдүгээр улирлын хэвлэл захиалгадаа анхаарах биз ээ.

Энэ бол гишүүд нь уншдаггүй, ул суурьтай мэдээлэл, мэдлэг авдаггүй, уламжлалт хэвлэл, цаасан сонины үнэ цэнийг гүйцэд ухаарахгүй тал төрийн түвшинд ч харагдах болсны бодит жишээ. Тогтмол хэвлэлийн тогийг таслах үйлдэл бүр дээрээсээ байна гэж харж болохоор.

Төрийн байгууллагуудын худалдан авалтын жагсаалтаас хэмнэлт нэрийн дор сонины захиалгыг хассан шийдвэр хэдэн жилийн өмнө гарсан. Тэр хэвээрээ байгаа бололтой. Тэглээ гээд гишүүд нь хэвлэл захиалах, түүнээс улс орны өдөр тутмын мэдээллийг авах, боловсруулах гэдэг соёлыг бүр таг мартаж орхисон бололтой. 

Уг нь саяхныг болтол төрийн албаныхны ажлын өдөр шинэхэн сонины дугаар уншихаас эхэлдэг, төрийн гурван өндөрлөг хүртэл ажил эхлэхэд ширээн дээр нь тухайн өдрийн сонинуудын тойм хүлээж байхыг шаарддаг байлаа. Гэтэл тийм уламжлал үгүй болсноор төрийн албан хаагчид сошиалаар ажлаа явуулдаг, хийсэн нь ажил нь олон нийтийн сүлжээгээр муулуулсан бол хэрэгтэй ч байсан орхидог, харин магтуулсан бол ор хэрэггүй зүйлийг ч хэрэгтэйд бодон лавшруулдаг зэргээр барьцгүй болсон байна.

Эх сурвалж: ӨГЛӨӨНИЙ СОНИН