Эминэм "өвөө" болох гэж буйгаа зарлалаа

Энэ жил 51 нас хүрч буй алдарт реппэр Эминэм тун удахгүй "өвөө" болох гэж буйгаа хэдхэн цагийн өмнө цацагдсан "Tempоrary" дууныхаа клипээр дамжуулан олон нийтэд зарлалаа. 

Түүний охин 28 настай Хэйли Жэйд Мэтерс анхны хүүхдээ тээж буй бөгөөд уг дууны видео клипэнд түүний бага нас болон хуримаа хийж буй үе, мөн аавдаа хэрхэн бие давхар болсон тухайгаа хэлж буй тухай бичлэгүүд багтжээ. 

Хэйлигийн хувьд өнгөрөгч 5 дугаар сард Эван МакКлинтоктой хуримаа хийсэн. Үүнээс хэдхэн сарын дараа ийнхүү анхныхаа хүүхдийг өлгийдөн авах гэж буй хосуудад болон реппэр Эминэмд шүтэн бишрэгчид нь баяр хүргэсэн сэтгэгдлээр цахим платформуудыг нь дүүргэсэн байна. 

Хосууд 2023 онд сүй тавьсан. Хэйлид гэрлэх санал тавихаасаа өмнө Эван МакКлинток Эминэмээс охинд нь гэрлэх санал тавьж болох эсэхийг асууж байжээ.