Усан доорх холбооны кабель сүлжээг хэрхэн хамгаалж байгаа тухай мэдээлэл өгөхийг шаарджээ

АНУ-ын Сенатын гишүүдийн бүлэг Орос, Хятадын зүгээс аюул нүүрлэж байгаа хэмээн үзэж буй нөхцөлд усан доорх холбооны кабель сүлжээний хамгаалалтыг хэрхэн хангаж байгаа тухай мэдээлэл гаргаж өгөхийг АНУ-ын Ерөнхийлөгч Жо Байдены засаг захиргаанаас шаарджээ.

“Дэлхийн усан доорх холбооны кабель сүлжээний эмзэг байдлыг АНУ тоймлон тодорхойлох шаардлагатай байна. Америкийн усан доорх холбооны дэд бүтцийн аюулгүй байдлыг хангах стратегиа засаг захиргаа тайлбарлах хэрэгтэй” сенатч Тодд Янгын нийтэлсэн Америкийн хууль тогтоогчдын захидалд тэмдэглэсэн байна. “АНУ-ын засаг захиргаа энэ асуудалд холбоотнуудынхаа дэмжлэгийг чухам яаж баталгаажуулахаар төлөвлөж байгаагаа тайлбарлах хэрэгтэй. Олон улсын мэдээ баримт, түүний дотор өдөр тутам хийдэг хэдэн их наяд долларын гүйлгээ, шилжүүлгийн тухай мэдээлэл дамжуулалтын 95 орчим хувь нь усан доорх холбооны кабель сүлжээгээр явдаг” гэж Америкийн хууль тогтоогчид онцолжээ.

Европын холбооны усан доорх сүлжээ халдлагад өртсөн тохиолдолд интернэтэд нэвтрэх өөр нэг аргыг эрж хайх төслийн санхүүжилтэд НАТО дэмжлэг үзүүлж байгаа тухай Bloomberg агентлаг долоодугаар сард мэдээлж байсан юм. Европын аюулгүй байдал ихээхэн хамааралтай байдаг холбооны усан доорх сүлжээ нь туйлын эмзэг гэж НАТО мэдэгдэж байсан билээ.