ОЛОН ӨНГӨ I Элдэв бодомжийн хэлхээс

-Өөрийн хэмжээг  тооцолгүй асар ихийг хүсэж мөрөөдөн алтан цагаа түймэрдэхээс илүү эмгэнэл ховор.

-Өвөрлөсөн муу санаа өөрт гай болдог. Өршөөл байхгүй шүү.

-Зөвхөн хар амиа бодсон сүсэг бишрэл бурхны номонд нийцдэггүй бөгөөд шал дэмий хэрэг болж дуусдаг. Бурхны ном бол бүхнийг хайрлах ухаан юм.

-Дэлхийн “ном”-ыг хүн унасан газраасаа эхэлж уншдаг .

-Бүргэдийн нисэх өндөрт тэмцсэн болжмор өөртөө эрсдэл авчирдаг.

-Өрөөлийг өөчлөн ярьж явдаг хүн өөрийгээ сүйдэлж байгаагаа мэддэггүй.

-Өнгө, мөнгөөр хүнийг ялгаварлагч нар төгс оршихуйн номыг хэзээ ч ойлголгүй , харанхуйгаар хорвоог гэтэлгэнэ.

-Шударгаар олсон мөнгө буян дагадагч хармын сэтгэлээр хандвал сайхан бүхнийг сорж дуусгадаг хуультай.

-Мэлмийтэй мөртлөө дотоод “хараа”- гүй хүн өрөвдөлтэй.

-Зохиол бичнэ гэдэг хайр энэрэл, гэрэл гэгээг түгээж байгаа үйлс юм.

Н.Даваадаш