ОЛОН ӨНГӨ I Монголчууд дэлхийн энтэй ард түмэн

Мөрөөдөх ч бас л сайхан шүү.

Нэгдүгээрт, “Улаанбаатарт байр хямд, агаар таатай юм” гээд япончууд ирж хороололд байр олноор аваасай.

Хоёрдугаарт, “Монгол хүүхдүүд багаасаа ажилсаг, хэрсүү юм” гээд Швед, Даниас арван жилд сурахаар анги ангиараа хүүхдүүд ирж, аав , ээж нь хамтдаа ирж шинэ тосгонд амьдраасай.

Гуравдугаарт, “Монголын төрөх тасагт эндэгдэл ер гардаггүй, эх барих эмч нар нь нарийн мэргэжлийн” гээд Австралиас эхчүүд ирж төрөөд, энд хүүхдүүдээ өсгөөд, цагаан идээнд дурлаасай.

Дөрөвдүгээрт, Монголын хөдөөд морин уралдаан явуулах зай талбай, тал хөндий элбэгтэй юм гээд бооцоот уралдааны хэд гурван жүчээ ажиллуулдаг, малын эмчтэй, уралдааны шилмэл морьдтой хүмүүс ирж байрлаад, мал аж ахуйн эрүүл мэндэд орчин үеийн эмчилгээ, арчилгааг нэвтрүүлэхэд нөлөө үзүүлээсэй.

Тэгвэл тэнд морины туурь хамгаалах, адууны бэрэвхий хамгаалах, унагыг багаас нь гоё үс зүстэй сойзоор арчиж тордох,монгол адууны гайхамшгийг хамтад нь дэлхий нийтэд таниулах юмсан. Монгол таагдашгүй дөрвөн улиралтай, тайлагдашгүй сонин цаг ууртай, эзэн хүндээ ээлтэй, бүс нутаг  нь ч амьдрахад хамгийн таатай гэж дэлхийн онгоцууд агаарын замын мэдээлэл олох гэж цуваа цуваагаар бууж мордоосой. Тэнд хүний сайн нь, хүүхний сайхан нь, хамгийн ажилсаг нь, хамгийн халамжтай нь, хамгийн ухаалаг нь аж төрдөг гэж дэлхийн олон сайхан хотуудаас Чингис хааны минь сүр хүчний дор биширч яваасай. Дийлэшгүй нь  байдаггүй юм  гэхэд дэлхийн энтэй ард түмэн шүү гэж хайр дааж явцгаая даа.

С.Оюунчимэг /Монгол Улсын Соёлын гавьяат зүтгэлтэн/