Мьянмарт газар хөдлөлтийн улмаас амиа алдсан хүний тоо 1.7 мянгыг даваад байна

Мьянмарт газар хөдлөлтийн улмаас амиа алдсан хүний тоо 1.7 мянгыг даваад байна гэж тус улсын Төрийн захиргааны зөвлөл мэдээлжээ. Байгалийн гамшгийн улмаас 3.4 мянган хүн бэртэж, гэмтсэн бол 300 орчин хүн ор сураггүй алга болоод байна.

Энэ сарын 28-нд болсон 7.8 орчим магнитудын хүчтэй газар газар хөдлөлт Тайланд, Хятад, Бангладеш, Малайз, Вьетнамд мэдрэгдсэн билээ. Тайландад амиа алдсан хүний тоо 18-д хүрч, 76 хүн сураггүй алга болоод байна.

Афтершок буюу газрын чичирхийлэл хэдэн долоо хоног үргэлжилнэ гэж үзэж байгаа бөгөөд Тайландад гэхэд 10-15 минут тутамд, нийт 168 газрын чичирхийлэл бүртгэгдээд байна. Мьянмарт 800 орчин барилга байгууламж, газрын тос дамжуулах хоолой зэрэг дэд бүтэц сүйрээд байгаа бөгөөд томоохон дангууд аюултай байдалд ороод байна.

Байгалийн гамшигт өртөөд байгаа Мьянмар, Тайландад олон улсын зүгээс тусламж үзүүлж, эв нэгдлээ илэрхийлээд байна. Тухайлбал, ОХУ, БНХАУ аврагчдын багаа илгээгээд байгаа бол Малайз, Зүүн өмнөд Азийн орнуудын холбоо хүмүүнлэгийн тусламж илгээхэд бэлэн буйгаа илэрхийлжээ.

БНХАУ 13 сая ам.долларын хүмүүнлэгийн тусламж олгохоо мэдэгдсэн бол, Энэтхэг Мьянмарт тусламж үзүүлэх “Брахма” ажиллагааг эхлүүлжээ. Энэ хүрээнд тус улс хүмүүнлэгийн тусламж бүхий таван тээврийн онгоц, хоёр хөлөг онгоц илгээжээ. Малайз улс мөн аврагчдын багаа илгээхээр болсон байна. Түүнчлэн Израилын Ерөнхий сайд Биньямин Нетаньяху Тайлан руу шинжээчдийн багаа илгээх захирамж гаргаж, газар хөдлөлтөд өртсөн Тайланд улс Мьянмарт цэргүүдээ хэдийн илгээжээ. Их Британи улс Мьянмарт 13 сая ам.долларын тусламж үзүүлэхээ мэдэгдсэн бол Индонезийн эрх баригчид Мьянмар руу аврагч, эмч нарын багуудын илгээж, хүмүүнлэгийн тусламж үзүүлэхээ илэрхийлээд байна.