С.Мөнхбат аварга хөдөөгүүр сайн үйлийн үр тарьсаар явна

Монгол улсын 20 дахь аварга Сүхбаатарын Мөнхбат хотод хорогдож суулгүй, зав боломж л гарвал хөдөөгүүр явж, өв соёл, ёс уламжлалыг түгээн дэлгэрүүлэх, байгаль орчноо хайрлан хамгаалах, ирээдүй хойч үеэ сурган хүмүүжүүлэх үйлсийн төлөө ажилласаар байна. 2019 онд түүний үүсгэн байгуулсан “Бор аварга сан” сангийн ажил зогсолтгүй  урагшилсаар, иргэд, хүүхэд залууст улам бүр хүрсээр байгаа юм.

Аваргын санаа бол Монгол эр хүний үнэ цэнийг бий болгох, мөрөөдөл зорилготой баялаг бүтээгч иргэнийг бүтээхийг хүсэж, “Эзэн байя”, “Монгол мөрөөдөл” зэрэг төслийг амжилттай хэрэгжүүлж, 20 мянга гаруй хүүхэд залуусыг сургалтдаа хамруулаад амжжээ.

Хавар ирж, урь ормогц энэ сарын 23, 24-ний өдрүүдэд Баянхонгор аймгийн Баацагаан, Баянцагаан, Баян-Өндөр сумдад очиж, “Эзэн байя”, “Монгол мөрөөдөл” лекцээ иргэд, хүүхэд залууст хүргэхийн зэрэгцээ чөлөөтэй ярилцаж, үзэл бодлоо солилцов. Энэ үед сум эзгүйрч, залуус хотыг зорих болсон талаар, мөн архидалт их байгааг уулзалтад оролцсон хүмүүс онцлон ярьж, гарц гаргалгаа хайцгаалаа.

Бор аваргын бор зүрхээрээ бие даан хийж хэрэгжүүлж буй энэ ажил хөдөө орон нутагт үгүйлэгдсэн, иргэд, хүүхэд залууст нэгийг бодуулж, хоёрыг тунгаалгасан сайхан ажил болж буйд түмэн олон талархаж, дараа дараачийн сумд хүлээдэг болжээ. Энэ удаад л гэхэд Баянхонгор аймгийн Баацагаан, Баянцагаан, Баян-Өндөр сумын 2000 гаруй хүүхэд залуус, иргэдтэй аварга нүүр тулан уулзаж, асуудлыг нь сонсож, санал бодлоо дэлгэн ярилцлаа.