Хоошёорюүг ялсан Оохо: Миний сүүлчийн тулаан гэж бодож гарсан

Мэргэжлийн сүмогийн Нацү башёгийн гурав дахь өдөр ёкозүна Хоошёорюү С.Бямбасүрэн маэгаширагийн 1 дээр эрэмбэлэгдсэн Ооход ялагдлаа.

Хоёр бөх эхэлж хүчтэй тулахад Хоошёорюү бага зэрэг байрлал алдан ухраад эргэж хүчтэй тонгойн дайрахад өрсөлдөгч нь дарж татаад давсан юм.
 

Хоошёорюү, Оохо хоёр бол хоёулаа 25 настай, хоёулаа нэг өдөр нэгэн зэрэг мэргэжлийн сүмод хөл тавьсан. Мөн хоёулаа бөхийн мундаг удамтай залуус. Хоошёорюүг Улсын заан Донровын Долгорсүрэнгийн ач мөн улсын аварга Д.Сумъяабазар, улсын начин Д.Сэржбүдээ, ёкозүна Асашёорюү Д.Дагвадорж нарын ах Д.Сугаррагчаагийн хүү гэдгийг монголчууд андахгүй сайн мэднэ.

Тэгвэл Оохогийн хувьд 32 башёд түрүүлсэн домогт ёкозүна Тайхогийн зээ хүү, сэкивакэ Такаторикигийн хүү юм.
 

Өчигдөр Хоошёорюүг ялснаар Оохо хоёр дахь “Алтан од” шагналаа гардлаа. Үүнээс өмнө 2024 оны Харү башёд ёкозүна Тэрүнофүжиг ялж, эхний “Алтан од”-оо гялалзуулсан. 

Өнгөрсөн нэгдүгээр сарын башёд 12 давж, түрүү бөхийг тодруулахаар гурван бөх нэмэлт барилдаан хийх болоход Хоошёорюүд ялагдаж, боломжоо алдаж байлаа.
 

Харин өчигдөр Хоошёорюүг ялсныхаа дараагаар Оохо “Миний сүүлчийн тулаан гэж бодож,өөрийгөө ирлэж гарсан. Ялсандаа баяртай байна. Ер нь би барилдааны өмнө нэг их сандарч тэвддэггүй. Тиймээс заримдаа өөрийгөө ирлэж барилдахаараа илүү сайн барилддаг юм шиг санагддаг” гэжээ.

Тэрбээр башё эхэлснээс хойш нэг ёкозүна /Хоошёорюү/, нэг озэки /Котозакүра/, нэг сэкиваке /Киришима/-г ялчихаад байна. “Үүнээс илүү сайнаар тэмцээнийг эхлүүлнэ гэж байхгүй. Би цаашид ч энэ янзаар үргэлжлүүлж чадна гэж найдъя” хэмээн өгүүлжээ. Гэвч өнөөдөр түүний өрсөлдөгч нь ёкозүна цол горилж буй озэки Ооносато байх болно.