Ооносато: Хоошёорюү бол миний давж гарах ёстой хана хэрэм

Мэргэжлийн сүмогийн Нацү башёд озэки Ооносато 14 даваатайгаар түрүүлж, ёкозүна цол хүртэх нь нэгэнт тодорхой болсон. Тэрбээр сүүлийн өдөр давсан бол нэг ч уналгүйгээр түрүүлэх байв. Уналгүйгээр түрүүлж чадаагүйдээ ихээхэн харамсаж буй нь дүр төрхөөс нь ил байлаа.

Японы зарим хэвлэлийн мэдээлснээс үзвэл Эзэн Хааны цомыг дөрөв дэхээ хүртэж, хоёр дараалан башёд түрүүлснээр ёкозүна болж буй ч гэлээ сэтгэл нь Хоошёорюүд ялагдсандаа илүү шаналсан шинжтэй байсан гэнэ.
 

Тэмцээний дараагаар бэлтгэлийн өрөөнд сэтгүүлчид ярилцлага авахдаа Хоошёорюүд ялагдсан талаар ямар бодолтой байгааг асуухад юу хэлэхээ бэлдэж байна уу гэмээр бодолхийлснээ “Намайг ёкозүна цол горилогч гэхэд би бодсон л доо. Үнэхээр би хамгийн шилдэг нь үү гэж... Тэгээд бодоод өөрийгөө шилдэг нь гэдгээ хүлээн зөвшөөрсөн.

Гэхдээ түүнээс урьтаж ёкозүна болоогүйдээ бага зэрэг сэтгэл гонсойсон. Нэгдүгээр сарын башёгийн дараагаар Ниигатад амрахаар очоод байхад Хоошёорюүд ёкозүна цол олгож, Мэйжигийн сүмийн өмнө ёслол хийхийг зурагтаар харахдаа “Би энд юу хийж байгаа юм бэ?” гэж өөртөө хэлсэн. Сэтгэл хачин болчихсон. Тэр агшныг үзэж суухдаа төрсөн бодол мэдрэмж маань намайг хөдөлгүүрээ улам хүчтэй асаахад хүргэсэн” гэжээ.
 

“Хоошёорюүг та өрсөлдөгчөө гэж бодож байна уу?” гэж нэмж асуухад “Тийм ээ, жинхэнэ өрсөлдөгч. Миний зорилго ч гэж хэлж болно. Энэ бол миний давж гарах ёстой хана хэрэм. Энэ удаад би дахиад ялагдлаа. Дараагийн удаад ялахын төлөө чадах бүхнээ хийх болно” хэмээжээ.

Ооносатогийн ааваас сэтгүүлчид Хоошёорюүд сүүлийн өдөр ялагдахад ямар бодол төрж буйг асуухад “Бүх барилдаандаа ялаасай гэж хүсэж байлаа. Гэвч энэ ялагдал илүү сайжрахад нь их дэм өгнө гэж бодож байна. Ёкозүнад ялагдснаа марталгүй, дараа нь ялна гэдэгт итгэж байна” гэжээ.
 

Харин ёкозүна Хоошёорюү сүүлчийн өдөр давсныхаа дараагаар “Ёкозүнагийн хувьд би давна гэсэн бүрэн итгэлтэйгээр гарсан. Анхаарлаа сайн төвлөрүүлж, давж чадлаа” гэсэн юм.