Гадаад валютын улсын нөөц 2024 онд түүхэн дээд хэмжээнд хүрчээ

Сүүлийн жилүүдэд хэрэгжүүлсэн мөнгөний хатуу бодлого үр дүнгээ өгч, инфляц 2024 оны туршид Төв банкны зорилтот интервалд хадгалагдсан нь эдийн засаг, санхүүгийн салбарын тогтвортой байдлыг хангахад дэмжлэг үзүүллээ гэж Монголбанкны ерөнхийлөгч Б.Лхагвасүрэн мэдэгдэв. 

Гадаад валютын улсын нөөц 2024 онд түүхэн дээд хэмжээнд буюу 5.5 тэрбум ам.долларт хүрсэн байна. Монголбанк, Хятадын Ардын банк хооронд байгуулсан “Үндэсний мөнгөн тэмдэгт солилцох своп хэлцлийн гэрээ”-ний ашиглалтын үлдэгдлийг хоёр дахин бууруулж, гадаад өрийн дарамтыг багасгажээ. Түүнчлэн, Монгол Улсын зээлжих зэрэглэлийг B+ түвшинд хүргэн нэг шат ахиулсан бол банкны салбарын актив хөрөнгө 2024 оны эцсийн байдлаар 25.1 хувиар буюу 14.3 их наяд төгрөгөөр өсөж 71.4 их наяд төгрөгт хүрсэн бол чанаргүй зээлийн хувь хэмжээ 4.4 хувьд буюу 2015 оноос хойшхи хамгийн бага түвшинд хүрсэн байна.

Олон улсын стандарт, шаардлагыг хангасан Apple Pay үйлчилгээг амжилттай нэвтрүүлж, Монгол Улсын цахим төлбөрийн экосистемийг шинэ түвшинд хүргэх эхлэлийг мөн тавьжээ.

FICO зээлийн онооны системийг Монголд анх удаа нэвтрүүлснийг Монголбанкны тэргүүн онцлоод цаашид эдийн засаг, санхүүгийн тогтвортой байдлыг хангах, санхүүгийн зуучлалын хэвийн үйл ажиллагааг хангах, үр ашгийг нэмэгдүүлэх хүрээнд Монголбанк бодлого, үйл ажиллагаагаа тууштай чиглүүлэн ажиллана гэв.