С.Баярцогт: Тухайн үед Монгол Улс гаднын зах зээлээс мөнгө босгох туршлагагүй байсан

Оюутолгойн бүлэг ордын ашиглалтын талаарх сонсголд оролцож буй Сангийн сайд асан С.Баярцогт гэрчээр тайлбар өглөө.

Тэрээр хэлэхдээ “Тухайн үед Монгол Улс олон улсын зах зээлээс мөнгө босгох туршлагагүй байсан. Дандаа олон улсын хөгжлийн банкнуудаас зээл авдаг байсан юм. Монгол тухайн үед олон улсын валютын сангийн хөтөлбөрт орчихсон, дотооддоо орлого муу, зээлжих зэрэглэл гадна зах зээлээс мөнгө босгох ямар ч бололцоогүй байсан учир бид энэ мөнгийг хөрөнгө оруулагч тал босгооч ээ гэх хүсэлт тавьсан” гэсэн юм.

Сангийн сайд асан С.Баярцогтын хэлж буйгаар тухайн үед харилцан тохиролцсоны үдсэн дээр гэрээний дараа шууд хэлэлцээр хийжээ. Энэ хэлэлцээрийн дагуу 2011 оны 6-р сарын 8-нд LIBOR+6.5% болгосон байна.

Оюу толгойн хувь нийлүүлэгчдийн зээлийн бодит хүү сүүлийн 15 жилийн хугацаанд дунджаар 8% байсан бол сүүлийн гурван жилд 10% давжээ.

С.Баярцогтын хэлж буй LIBOR+6.5% гэдгийн LIBOR гэх ойлголтыг 2023 онд албан ёсоор зарлахаа больсонтой хоблогдуулан 2023 оны есдүгээр сарын 28-ны өдрөөс SOFR-аар орлуулсан юм. SOFR гэдэг нь АНУ-ын Засгийн газрын үнэт цаасаар баталгаажсан нэг шөнийн санхүүжилтийн хүү бөгөөд хувь хэмжээ нь хэлбэлзэж байдаг. Өөрөөр хэлбэл инфляц өсөхөд арилжааны банкны зээлийн хүү өсдөг зах зээлийн зүй тогтлын дагуу SOFR нь зах зээлийн зарчмаар өсөж, буурдаг хувь юм байна.

Улсын Их Хурлын 2025 оны 62 дугаар тогтоолоор байгуулагдсан Оюутолгойн бүлэг ордын ашиглалтад Монгол Улсын эрх ашгийг хангуулах, хүртэх өгөөжийг нэмэгдүүлэхтэй холбоотой баримт бичиг, үйл ажиллагаанд хяналт шалгалт хийх Улсын Их Хурлын хянан шалгах түр хорооны нотлох баримтыг шинжлэн судлах сонсгол өнөөдөр (2025.12.10) хоёр дахь өдрөө үргэлжилж байна.