Барилга ЭКСПО| Барилгын салбарын онцлох сэдвээр семинар болно
Монгол Улсад орчин цагийн барилгын салбар үүсэж хөгжсөний 100 жилийн түүхт ойн хүрээнд зохион байгуулагдаж буй 40 дэх удаагийн “BARILGA EXPO” олон улсын барилгын үзэсгэлэн, яармаг 2026 оны есдүгээр сарын 11–13-ны өдрүүдэд “Буянт-Ухаа” ордонд болно.
Энэ удаагийн үзэсгэлэн яармаг нь барилгын салбарын өнөөгийн хөгжил, шинэ технологи, томоохон төсөл, хөрөнгө оруулалт, чанар, стандарт, аюулгүй ажиллагаа болон ирээдүйн чиг хандлагыг нэг дороос танилцуулах өргөн хүрээний арга хэмжээ юм.
Үзэсгэлэн яармагт олон улсын 100 орчим компани, үндэсний 400 гаруй аж ахуйн нэгж, байгууллага оролцож, барилгын материал, тоног төхөөрөмж, инженерийн шугам сүлжээ, интерьер, экстерьер, дэд бүтэц, ногоон барилга, эрчим хүчний хэмнэлт болон шинэ технологийн бүтээгдэхүүн, үйлчилгээг танилцуулна.
Мөн үзэсгэлэнгийн гурван өдрийн турш төсөл хэрэгжүүлэгч, хөрөнгө оруулагч, инженер техникийн ажилтан, салбарын мэргэжилтэн, үйлдвэрлэгч, ханган нийлүүлэгч, амины орон сууц сонирхогчдод зориулсан сэдэвчилсэн семинар, илтгэл, танилцуулгууд зохион байгуулагдана.
Үзэсгэлэнгийн эхний өдөр төсөл хэрэгжүүлэгч, хөрөнгө оруулагч, байгууллагын удирдлагуудад зориулсан илтгэл, хэлэлцүүлэг зохион байгуулагдана.
Энэ өдөр барилгын чанар, аюулгүй байдал, баталгаажуулалт, норм дүрмийн хэрэглээ, нийслэлд хэрэгжиж буй томоохон төсөл, дахин төлөвлөлт болон барилгын төслийн эрсдэлийн удирдлага зэрэг салбарын цаг үеийн асуудлыг хөндөнө.
Мөн энэ өдөр 16:00–18:00 цагт “INTERNATIONAL BUSINESS MEETING” бизнес уулзалт зохион байгуулагдана.
Уулзалтаар Монголын төсөл хэрэгжүүлэгч, захиалагч, барилгын компаниудыг олон улсын үйлдвэрлэгч, ханган нийлүүлэгч, технологийн компаниудтай шууд холбож, шинэ түншлэл, бүтээгдэхүүн нийлүүлэлт, хөрөнгө оруулалт болон хамтын ажиллагааны боломжийг бүрдүүлнэ.
Хоёр дахь өдөр инженер, техникийн ажилтан болон барилгын салбарын мэргэжилтнүүдэд зориулсан мэргэжлийн илтгэл, танилцуулга, хэлэлцүүлгүүд үргэлжилнэ.
Энэ өдөр барилгын талбайн өдөр тутмын аюулгүй ажиллагаа, ХАБЭА, амины орон сууцны төлөвлөлтөөс гадна хиймэл оюун ухаан, BIPV технологи, эрчим хүчний үр ашиг зэрэг салбарт нэвтэрч буй шинэ технологи, чиг хандлагыг онцлон авч үзнэ.
Үзэсгэлэнгийн гурав дахь өдөр амины орон сууц, ногоон барилга, сэргээгдэх эрчим хүч, халаалт, эрчим хүчний хэмнэлт, барилгын материалын худалдаа, нийлүүлэлтийн шийдлүүдэд түлхүү анхаарна.
Амины орон сууц барих, худалдан авах, төлөвлөх гэж буй иргэдээс гадна барилгын материал, шинэ технологи, эрчим хүчний шийдэл сонирхож буй иргэн, аж ахуйн нэгжүүдэд хэрэгцээтэй мэдээлэл, мэргэжлийн зөвлөгөөг хүргэнэ.
Үзэсгэлэнгийн өдрүүдэд оролцогч компаниуд шинэ бүтээгдэхүүн, технологийн танилцуулга, бүтээгдэхүүний туршилт, мэргэжлийн зөвлөгөө өгөхөөс гадна худалдан авалт, захиалга, хамтын ажиллагаатай холбоотой тусгай нөхцөл, хөнгөлөлтүүдийг санал болгоно.
Сэтгэгдэл ( 0 )