С.Эрдэнэ: Намын даргын сунгаа нээлттэй, ил тод явагдана

Ардчилсан намын Зургадугаар их хурал морин цагт /11.40/ Ардчиллын сүлд дуу болох Хонхны дуугаар эхэлсэн билэээ. Тус намын Их хуралд сум, аймаг, нийслэл, дүүргээс сонгогдсон нийтдээ 1210 төлөөлөгч оролцож байгаа юм. Их хурал одоогоор түр завсарлага аваад байна. Энэ үеэр АН-ын бүлгийн дарга С.Эрдэнээс Их хурлын талаарх санал сэтгэгдлийг нь сонссон юм.

Тэрбээр “Энэ Их хурлаар гол нь намын үндсэн дүрмээ шинэчлэн батална. Өнөөдөр намын дүрэмдээ өөрчлөлт оруулах зайлшгүй шаардлага тулгарсан. Жишээ нь анхан, дунд шатны намуудад нээлттэй байх, намын бүх шатны гишүүдийн оролцоог тэгш хангах боломжийг бүрдүүлэх зэрэг олон асуудлууд байна. Тийм учраас эдгээр асуудлыг яриа хэлэлцээрийн шатанд биш үндсэн дүрмийн нэмэлт өөрчлөлтөөр оруулж байж шинэчлэлт хөдөлгөөнийг хийнэ гэж харж байна. 

Намын даргын тухайд  ирэх хоёрдугаар сарын 19-ны үеэр тодруулах болов уу ҮЗХ-дээр яригдсан. Хамгийн гол нь намын даргын сунгаа нээлттэй, ил тод, саналын эрхтэй бүх гишүүдийн хүрээнд явагдахаар шийдвэрлэсэн байгаа. Их хурлын дараа ҮЗХ  хуралдана. Үүгээр хамгийн олон санал авсан эхний дөрвөн нэр дэвшигчийг тодруулж үүний хүрээнд намын даргын сунгаа явагдана. Түүнчлэн  "Эмэгтэй нэг дэд дарга заавал байх шаардлага байна" гэсэн  эмэгтэйчүүдийн гаргасан санал яригдаж байгаа" гэв.

 Үргэлжлүүлэн намын шинэтгэлийн хөтөлбөрийн талаарх хэлэлцүүлэг өрнүүлэх юм.

Б.Алтжин