АН-ын томилсон хүчний байгууллагуудын удирдлага МАН-ын үед ч солигдохгүй байгаа нь ямар учиртай вэ

 АН-ын Их хурлын эхний өдөр Ардчилсан намын дарга асан, Ерөнхий сайдын албыг хашиж байсан Н.Алтанхуягийн тавьсан илтгэл СТӨ-нд цугласан 1210 төлөөлөгчийн сэтгэл зүрхийг огшоож хэдэнтээ алга ташуулав. Энэ үеэр тэрээр  Шинэчлэлийн Засгийн газрыг огцруулсан намын гишүүдээ буруутгахгүй гэдгээ хэлж намын нөхдөө өмнөх шигээ гал цог, эр зоригтой байхыг уриалав.  

Тэрбээр "Ардчилсан нам МАН-аас тохой өндөр гэдгийг ард түмэн хэлдэг. Манай ардчиллынхан хийж, бүтээж, босгож чаддаг, ард түмнийхээ төлөө ажиллаж чаддаг, эрчим хүч, орон сууцаа босгож чадсан нам. Гэхдээ нэг л юм нь болохгүй байна. Манай Х.Тэмүүжин хууль хяналтын байгууллагын шинэчлэлийг хийх гэж зориглосон юм.Би ч  түүнийг дэмжээд Хуулзүйн сайд болгож байсан.  Гэвч түүний санаачилсан шинэчлэлийг нураасан. Хууль  хяналтын салбарын шинэчлэл олигтой явсангүй. Биднийг байшингаа бариад, зам харгуйгаа янзлаад, эрчим хүч, дулаанаа тавиад явж байх үед нөгөө талд хууль хяналтын байгууллага дээр хонгилын тогтолцоо бий болгосон. Хүмүүсийг хэлмэгдүүлдэг тогтолцоог тэнд бий болгосон. Хонгил гэдэг бол мөрдөн байцаалтаасаа эхлээд магадгүй Ц.Элбэгдорж хүртлэх хонгилыг хэлж байгаа юм. Захиалга өгдөг, зохиомол хэрэг үүсгэдэг, шоронд хийдэг, дарамталдаг бүр өөрийн гэсэн мөрдөн  байцаагчтай, мөн өөрийн шүүгчтэй. Үүнийг Ц.Элбэгдорж Ардын намтай хамтарч хийж байна. МАН бол явцуу бодолтой, чимээгүй ширээний араар ороод манай намыг “алах” ажлыг хамтран хийсэн. Би та  нарт амьд жишээ хэлье. АТГ-ын дарга Н.Ганболд таван жил ажиллаад өргөдлөө өгөөд явсан. Тэр хүн М.Энхболдыг хотын дарга байхад Цагдаагийн дарга байсан хүн. Харин М.Энхболдыг Ерөнхий сайд байхад нь Тагнуулийн газрын дарга байсан. Бид Монголын нийгмийг  дахин өөрчилж болохгүй юм уу. Манай ардчиллынханд эр зориг хэрэгтэй. Бид 2,3 хүнээс биш таван хүнээс ч хамаардаггүй ийм л нам байх ёстой. Ч.Сайханбилэгийн Засгийн газар байгууллагдсаны дараа Тагнуулын газрыг даргыг сольсон. ЦЕГ-ын даргыг мөн солиод өөр хүн томилсон. Засгийн газрын ХЭГ-т бас л өөр хүн тавьсан. Алтанхуягийн Засгийн газраас Сайханбилэгийн Засгийн газарт очиход дээрх байгууллагуудын дарга нар ингэж солигдсон  мөртлөө АН-аас МАН засаг авчихаад  солигдохгүй л байгаа юм даа. Юу гэсэн үг үү” гэв.

Түүний хэлсэн дээрх өгүүлбэр МАН өнгөрсөн сонгуульд яаж ялав, юуг ашиглав гэдгийг цөм бүрэн илэрхийлээ. Өөрөөр хэлбэл  МАН-ын үед ч АН-ын томилсон хүчний байгууллагуудын удирдлага солигдохгүй байгаа нь нам дамнасан бүлэглэл гэгчийн бэлээхэн баримт, нотолгоо нь болж таарч байгаа аж. Н.Алтанхуягийн энэ дүгнэлт үнэхээр ч анхаарахгүй өнгөрч боломгүй баримт юм. Хэдийгээр АН-ын угшилтай Ц.Элбэгдорж Ерөнхийлөгчийн албанаас буугаагүй байгаатай эдгээр томилгоог холбон тайлбарлаж болох ч нэг Засгийн газар нөгөөгөөр солигдсоны дараа зайлшгүй өөрчлөгддөг албан тушаал бол ЦЕГ болон ТЕГ-ын удирдлага билээ. Гэвч өнөөдөр дээрх хууль, хүчний байгууллагуудын удирдлага солигдоогүйгээр үл барам, өнгөрсөн УИХ-ын сонгуульд АН-ыг ялагдуулж, МАН-ыг ялуулах зорилгод үйлчилсэн гэх хардлага ч хүчээ аваад эхэлжээ. Нөгөөтэйгүүр, энэ баримт нь АН болон МАН-ы нэр бүхий хүмүүс нэг ашиг сонирхол, нэг бүлэглэл болж нэгдсэний илэрхийлэл гэж Н.Алтанхуяг дүгнэлээ. 

Б.Алтжин