Төрийн тэргүүнүүдийн ”ЗОДООН” юуны ЦОНДОН бэ!

Билгэдэж сонгосон уу яасан, Шинийн 8-ны билэгт сайн өдөр экс Ерөнхийлөгч Ц.Элбэгдорж гэв гэнэт олны өмнө гарч ирэв. Түүний ил гарч ирсэн зорилго нь Ерөнхийлөгч Х.Баттулгад хандсан дайралт байсан бөгөөд ямар нэг том зүйлээс өөрийгөө хамгаалах төлөвлөгөөт ажлынх нь эхний хэсэг байсан гэж харагдахаар байв. 

Шалтгаан нь Ерөнхийлөгч Х.Баттулга /2019.01.16/ Прокурорын байгууллагын удирдах ажилтны зөвлөгөөнд оролцож, тэдний үйл ажиллагаатай холбоотой санал хүсэлтээ илэрхийлэх үеэр “Ц.Элбэгдорж гадны компанитай хуйвалдан, стратегийн орд газар болох Тавантолгойг өгөх ажлыг зохион байгуулсан. Баримтууд нь бүгд байна. Би энэ өдөр Ерөнхий прокурор танд Прокуроруудын удирдах ажилтнуудын зөвлөгөөн дээр иргэн Х.Баттулгын хувьд 178 хуудас баримтыг гардуулж байна, хэргийг шалгуулья” хэмээсэн.

Энэ л 178 хуудас материал түүнийг ийнхүү яаран сандран хэвлэл мэдээлэлд хандахад хүргэсэн хэрэг байх. Өөрийн сошл пэйж хуудсаар шууд дамжуулан цацсан хэвлэлийнхэнтэй хийсэн уулзалтын үеэр тэрбээр өөрийгөө “Энхийн цагаан тагтаа” болгон харагдуулах гэж ихэд хичээснийг бид харсан. Даанч түүний сүүлийн гучаад жилийн зузаан түүх нь “Энхийн” болгох ямар ч боломжгүй учраас арга мухардаж байсан ч “цагаан” болгохын төлөө илт улайрсан нь өөрийгөө улам ч харлуулав бололтой. Ингэлээ гээд Ерөнхийлөгч Х.Баттулгыг цагаан цайлган гэж өмгөөлөх гэсэнгүй. Тэртээ тэргүй түүнд хангалттай бараан намтар бий. 

Тэгэхээр Ц.Элбэгдоржийг “нүх”-нээс нь гаргаж ирсэн тэр 178 хуудас материалд ихээхэн учир байна гэдгийг төвөггүйхэн ойлгож болохоор. Ерөнхийлөгч Х.Баттулга иргэн хүнийхээ хувиар хардах эрхийн хүрээнд Прокурорын байгууллагад хүсэлт гарган, материал хүргүүлж болох л байсан. Тэгэхдээ бүр олон нийтийн хэрэгслийн өмнө ил гардуулж байгаа нь цаанаа илт өөр зорилгыг агуулж байна. Түүнээс хүсэлтээ хэвлэл мэдээлэлгүйгээр Прокурорт хүргүүлж болох. Гэхдээ Ерөнхийлөгч бол Үндэсний аюулгүй байдлын зөвлөлд байдаг хүн гэдгийг санах хэрэгтэй. Уг нь иш мухаргүй гудамжинд хашхирч зогсоо Иргэний нийгмийн байгууллагын төлөөлөл биш л баймаар. 

Хамгийн гол нь Монгол Улсын Төрийн тэргүүн нь урьд өмнө ажиллаж байсан Ерөнхийлөгч аснаа ийнхүү олон нийтийн хэрэгслээр дайрч давшлах нь зүйд нийцэх үү. Гэтэл эргүүлээд Ерөнхийлөгч асан нь өдгөө алба хашиж байгаагаа нийтийн хэрэгсэлд муучлах ч бүр ёс зүйгүй асуудал болж байна. Бүрэн улсын Ерөнхийлөгч, Ерөнхийлөгчөөр найман жил ажилласан хоёр нөхөр ийнхүү сошл ертөнцөд нэгнээ "нүдэж" байгаа нь яавч сайн зүйл биш. Ямар багийн төв дээр цайны хэрүүл хийж суугаа чавганц нар биш дээ. Эцэстээ энэ хоёр нөхөр ямар нэг зүйл булаалдаж байгаа мэт харагдаж байна.

Монгол Улсын Ерөнхийлөгчөөр ажиллаж асан Н.Багабанди, Н.Энхбаяр нар хоорондоо дээрх хоёр эрхмээс дутуугүй дайсагнаж байсан ч тэд хэзээ ч олны өмнө гарч нэг нэгнээ үгийн муугаар дайрч байсангүй. Үүнийг Төрийн тэргүүн хүмүүсийн хувиар өндөр ёс зүйг сахисан гэж хэлэхэд болно. Харин 2009 онд Ерөнхийлөгчөөр сонгогдсон Ц.Элбэгдорж Н.Энхбаярыг үгийн муугаар дайрч байгаад "их айл"-д хүртэл суулгаад авсан. Үүнээс үүдсэн хоёр нөхрийн "зодоон" одоо ч дуусаагүй, хонзон өвөрлөсөн хэвээр байна. Гэтэл өдгөөгийн Ерөнхийлөгч Х.Баттулга Ц.Элбэгдорж руу дайрч, сөргүүлэн Ц.Элбэгдорж нь дайрч гээд нэгэн увайгүй үйлдэл улс төрд удамшин үлдэж байгаа нь харамсалтай. Үнэн хэрэгтээ "Хэрээ хэрээнийхээ харыг гайхаад" ч байгаа юм билүү хэн мэдлээ. Хэн хэнд нь асуудал байдаг бол дундаа, дотооддоо шийдээд явчихаж болно. Заавал улс орон даяар "харыг гайхуулцгаах" ямар хэрэг байна.

Ямартай ч 178 хуудас материалаар даллуулаад ил гарч байгаа Ц.Элбэгдоржийн цаашдын төлөвлөгөө юу вэ гэдэг нь өөрийн эрхгүй сонирхол татахын зэрэгцээ Х.Баттулга нь Элбэгийгээ сөрсөн ямар нэг зүйл хийх нь гарцаагүй харагдана. Аль аль нь өөрийгөө хамгаалж үлдэхийн тулд нэгнийгээ харлуулах гэсэн шигээ өөр хэн нэгнийг харлуулах оролдлого хийнэ, тэд. Тэдний сүүлийн гучаад жил хийж ирсэн улс төр бол энэ гэдэгт эргэлзэх хэрэг юун. Магадгүй, тэд арьсаа хамгаалж үлдэхийн тулд МАНАН-гаа нурааж олон хүний зовлонгоор өөрсдийгөө “Энхийн цагаан тагтаа“ болгож харуулахыг ч зорих нь дамжиггүй. Энэ нь нэг талаараа сайн. Яагаад гэхээр МАНАН дэглэмийг нураах өчигдөр эхлүүлсэн өнөөдрийн тэмцэлд нэмж буй томоохон цучил юм.  “Аливаа муу зүйлд ч сайн тал байдаг” гэдэг шиг "адгийн" гэх тодотгол зүүгээд удаж байгаа Ц.Элбэгдоржид ч сайн тал байгаа, "хулгайч" гэх нэр зүүсэн өдгөөгийн тэргүүнд ч байгааг эндээс харж болно.

Гэхдээ Ерөнхийлөгч Х.Баттулга Прокурорт, Ц.Элбэгдорж хэвлэл мэдээлэлд хандаж, нэг нэгнийхээ уурхайг ухаж байгаагийн нэгэн гол яриа бол Тавантолгой байгаа нь ч сонирхол татна. Аль аль нь Тавантолгойд холбогдох асуудал дэгдээж байсан нь өнөөдөр хэвлэлийн архивт дүүрэн байгаа. Ингэсний учир нь хоёр нөхөр нэг нэгнийхээ тогоо руу өнгийсөн юм биш биз гэсэн бодол төрж байгааг нуух юун. Эрхэм хоёрын хувьд идэр залуугаасаа нэгэн намын буулган дор зүтгэж нэг нэгнийхээ муу сайныг мэдэхийн дээдээр мэдэх болсон гэдэгт эргэлзэх хэрэггүй биз ээ.