Менингококкийн вакцин хийлгэснээс хойш 10-14 хоногийн дотор ДАРХЛАА тогтоно

Нийслэлд энэ оны эхний хоёр сарын байдлаар, менингококкт халдвараар 1-4 насны хүүхэд өвчилсөн гурван тохиолдол бүртгэгдсэн гэсэн мэдээллийг эрүүл мэндийн байгууллагаас өгч байсан. Гэхдээ өвчний тохиолдол нэмэгдэж, 7 болсон гэх мэдээлэл бас байна. Ер нь жил бүрийн 3-4 дүгээр сар болон 9-11 дүгээр саруудад эл өвчний тохиолдлууд бүртгэгдэж, гол төлөв А, В, С, W135 хүрээний нянгаар үүсгэгдсэн байдаг аж.

Менингококкт халдвар нь амьсгалын замаар дамжин халдварладаг тул дэгдэлт хэлбэрээр тархвал НАС БАРАЛТ ӨНДӨРТЭЙ өвчин гэдгийг мэргэжилтнүүд хэлдэг. 

Тэгэхээр энэ өвчнийг тусахгүй байхын тулд иргэд өөрсдийн зүгээс шаардлагатай арга хэмжээнүүдийг авах хэрэгтэй юм. Аливаа өвчнийг тусахгүй байх, хөнгөн тусч өнгөрөхөд хамгийн чухал нь дархлаа. Тиймээс өвчин эсэргүүцэх дархлаагаа нэмэгдүүлэх хэрэгтэй. Үүний тулд чанартай хоол хүнс хэрэглэх, цэвэр агаарт гарах, амин дэмүүд хэрэглэх гэхчлэн үндсэн арга хэмжээг авахаас гадна Менингококкт халдварын эсрэг ВАКЦИН тариулах хэрэгтэй болж байна.

Менингококкийн вакциныг Халдварт өвчин судлалын үндэсний төвийн /ХӨСҮТ/ Сайн дурын дархлаажуулалтын кабинетад ажлын 5 өдөр 8:30-14:30 цагийн хооронд хийж байна. Вакцины үнэ 13 мянган төгрөг.

 

Менингококкийн вакцин нь Энэтхэг улсад үйлдвэрлэгдсэн бөгөөд 1 тун нь 3 жилийн хугацаанд өвчний эсрэг дархлааг тогтоох аж. Вакцин хийснээс хойш 10-14 хоногийн дотор дархлаа тогтоно гэдгийг мэргэжилтэн хэлж байна.

Өмнөх жилүүдэд Менингококкийн вакциныг долоо хоногийн ажлын хоёр өдөрт хийдэг байсан. Тэгвэл одоо ажлын өдөр бүр хийж байгаа аж. Тиймээс ч вакцин хийлгэхээр очсон хүмүүсийн хувьд удаан хугацаанд урт дараалалд зогсох байдал харьцангуй гайгүй байна.

Менингококкийн эсрэг вакцин хийлгэхэд тавигдах шаардлага

 

-Нэг сарын дотор өөр төрлийн вакцин хийлгээгүй байх!

 

-Биед элдэв зовиур илрээгүй байх ёстой!

Менингококкт өвчний улиралчлал эхэлж байгаатай холбогдуулан Эрүүл мэндийн яамнаас эмнэлгийн тусламж, үйлчилгээний бэлэн байдлыг хангах арга хэмжээг эрчимжүүлж байгааг мэдэгдэж буй.

Эрүүл мэндийн сайд Д.Сарангэрэл 21 аймаг, нийслэлийн эрүүл мэндийн газрын удирдлагууд, хүүхдийн ерөнхий мэргэжилтэн, нярайн эмч нарт менингококкт халдвараас урьдчилан сэргийлэх чиглэлд онцгой анхаарч ажиллахыг үүрэг болгоод байна.

Ялангуяа өвчний шинж тэмдэг илэрсэн тохиолдолд шатлал харгалзахгүйгээр хүүхдийг тусгаарлан эмчилгээг яаралтай эхлүүлэн халдвартын эмч нараас зөвлөгөө авч ажиллахыг анхааруулжээ.

Мөн  менингококкт халдвар гарсан тохиолдолд мэдээллийг хэрхэн шуурхай солилцох, бусад тууралтат халдваруудаас ялган оношлох, эмчлэх талаар ХӨСҮТ-ийн нарийн мэргэжлийн эмч нар цахимаар хичээл зааж, асуултанд хариулсан байна.

Дэлхийн улс орнуудад менингококкт халдвар жилд дунджаар 500.000-1.200.000 тохиолдол бүртгэгдэж, 50-135 мянган хүн нас бардаг гэсэн судалгаа бий. Манай улсад 1950 оноос хойш менингококкт халдварын гурван удаагийн томоохон дэгдэлт бүртгэгдсэн байдаг аж.

Сүүлийн таван жилд менингококкт халдварын өвчлөл Орхон, Дархан-Уул, Дорнод, Сэлэнгэ, Сүхбаатар, Архангай аймаг болон нийслэл хотод 0-5 хүртэлх насны хүүхдийн дунд бүртгэгджээ. Уг өвчлөл 3-4 дүгээр сар болон 9-11 дүгээр саруудад зонхилон тохиолдож, гол төлөв А, В, С, W135 хүрээний нянгаар үүсгэгдсэн байна. Менингококкт халдвар нь амьсгалын замаар дамжин халдварладаг тул дэгдэлт хэлбэрээр тархвал нас баралт өндөртэй өвчин юм.

Тиймээс уг өвчний улиралчлал эхэлж байгаатай холбогдуулан дэгдэлт болохоос урьдчилан сэргийлэхэд иргэд өөрсдийн зүгээс авч болох арга хэмжээнүүдийг авч, хүүхдээ дархлаажуулахад анхаарах хэрэгтэй юм.

Холбоотой мэдээг ЭНД ДАРЖ уншина уу!