"Гудамжны номын сан"-тай боллоо

Заавал номын сангийн үнэмлэх, эсвэл мөнгөөр худалдаж авах шаардлагагүйгээр ном унших боломжтой боллоо. Тодруулбал Хан-Уул дүүргийн 120 мянгатын цэцэрлэгт хүрээлэнд өнгөрөгч амралтын өдрүүдэд “УБ-Гудамжны номын сан”-г байршуулсан байна.

Нийслэл хотдоо гудамжны номын сан байгуулах санаачилгыг орчуулагч Т.Тара гаргажээ. Тэрбээр энэ оны эхээр Франц улсад байхдаа улаан бүхээгтэй гудамжны номын санг хараад Монголдоо хэрэгжүүлэх боломжтой гэж үзжээ.

Номын санг мод, хуванцар зэрэг өртөг багатай гарын доорх матеирал, өөр бусад юугаар ч хийж, байрлуулж болно. Хамгийн гол нь иргэд сайн дураараа хайрцагт ном цуглуулж, олон нийтийн газруудад үнэ төлбөргүй унших боломжийг олгох юм. Түүнчлэн хүмүүсийн уншиж дууссан номыг солилцуулах, гудамжны номын сангийн соёлыг Монголдоо нэвтрүүлж, цагаа зөв боловсон өнгөрүүлж сурах, номд дуртай болоход нь тодорхой хэмжээгээр туслах зорилготой сайн дурын төсөл юм. Энэ онунлаг аяныг Арханай аймгийн Цэнхэр сумынхан нутагтаа хэрэгжүүлж, хоёр ч номын сан байрлуулсан байна.

“УБ-Гудамжны номын сан”-гийн дүрэм

• Та номоо газар дээр нь уншаад, буцаагаад хийх юм уу, түр зээлж, эсвэл өөр номоор сольж авч болно.
• “УБ – Гудамжны номын сан” нь танд зориулсан үнэгүй үйлчилгээ, номууд нь өгөөмөр сэтгэлтний хандив тул арилжааны зорилгоор бүү аваарай.
• Хайрцаг эвдэрч гэмтсэн байвал та өөриймсгөөр засаж сэлбээрэй.
• Зөвхөн ном, сурах бичиг, сонин сэтгүүл байрлуулна. Аливаа сурталчилгааны гарын авлага хайрцагт байрлуулсан байвал гаргаж тавиарай.
• Та ашигладаггүй, бусдад хандивлах боломжтой номоо байрлуулж, эсвэл сольж авч болно.
• Шинэ ном нэмэх бол та: “Хандивын ном тул арилжааны зорилгоор бүү ашиглаарай. УБ - Гудамжны номын сан фэйсбүүк бүлгэм.” гэсэн зааврыг номынхоо хавтасны дотор болон зарим хуудас дээр бичээрэй.

Энэ талаарх дэлгэрэнгүй мэдээллийг “УБ-Гудамжны номын сан/UB-Street library” фэйсбүүк группээс авах боломжтой юм.