Дүүргүүдийг холбосон авто замыг ирэх 10-11 сард ашиглалтад оруулна
Нийслэлийн ИТХ-ын төлөөлөгч Ц.Баатархүү тойрогтоо ажиллаж, нийслэлийн Засаг даргын Зам, тээврийн асуудал хариуцсан төслүүдийн удирдагч Б.Отгонсүх нарын холбогдох албаныхан Чингэлтэй дүүргийн нутагт барьж буй авто замын ажлын явцтай танилцлаа.
Улаанбаатар хотын төв хэсгийн авто замын ачааллыг бууруулахаар Чингэлтэй дүүрэгт 2015 оноос дүүрэг хоорондын холбоос замуудыг барьж буй. Тухайн ажлын хүрээнд өрнүүлж буй нэг бүтээн байгуулалт нь Чингэлтэй дүүргийн XII хорооны нутагт дахь авто замын ажил юм. Сонгинохайрхан дүүргийн нутаг дэвсгэртэй холбогдох эл 3.4 км авто замын ажлыг ирэх арваннэгдүгээр сард ашиглалтад оруулахаар ажиллаж байна.
Нийслэлийн Засаг даргын Зам, тээврийн асуудал хариуцсан төслүүдийн удирдагч Б.Отгонсүх энэ талаар “Чингэлтэй болон Сонгинохайрхан дүүргийг холбосон уг 3.4 км чулуун авто замыг нийслэлийн төсвийн 751 сая төгрөгаар тавьж буй. Эл авто замыг ашиглалт оруулсанаар Чингэлтэй дүүргийн иргэд Сонгинохайрхан дүүрэг рүү очихдоо заавал хотын төвөөр зорчих шаардлагагүй болно. Үр дүнд нь хотын төв хэсгийн авто замын хөдөлгөөний ачаалал буурна. Цаашид ийм сэтэлгээ хийж, авто зам тавих бүх боломжийг судалж, бүтээн байгуулалт өрнүүлнэ. Ингэхдээ замын чанарт онцгойлон анхаарна. Авто зам нэг жилийн настай, нэг бороонд урсдаг байж болохгүй. Тиймээс стандарт, чанарт нь онцгойлон анхаарч байгаа” гэсэн юм.
Үүний дараа төлөөлөгч Ц.Баатархүү Чингэлтэй дүүргийн нутаг, Хайлааст орчим барьж буй зам, гүүрийн ажлын явцтай танилцлаа. Уг зам, гүүрийн барилгыг ашиглалтад оруулснаар Чингэлтэй дүүргийн иргэд Баянзүрх дүүрэг рүү явахдаа мөн л хотын төвөөр зорчих шаардлагагүй болно.
Тодруулж хэлбэл, дээрх хоёр замыг ашиглалтад оруулснаар Баянзүрх дүүргийн иргэд Хайлаастын гүүрээр гарч, Чингэлтэй дүүргийн XII хорооны нутагт тавьсан замаар Сонгинохайрхан дүүрэгт очих боломжтой болно гэсэн үг. Хайлааст орчимд барьж буй зам, гүүрийн ажлын явцын талаар нийслэлийн ИТХ-ын төлөөлөгч Ц.Баатархүү “Уг авто зам, гүүрийн ажлыг он дамжуулан, нийслэлийн төсвөөс нийтдээ зургаан тэрбум төгрөг зарцуулан гүйцэтгэж буй. Ирэх аравдугаар сард хүлээлгэж өгнө. Гадна тойруугийн замын ажлын төлөвлөлт 2015 оноос эхлэлтэй. Цаашид хотын түгжрэлийг сааруулахын тулд дүүрэг хоорондын нийтийн тээврийн төлөвлөлт хийж байгаа. Тиймээс дүүрэг хоорондын авто замын бүтээн байгуулалтыг сайжруулах ёстой юм” гэсэн юм.
Дашрамд сонирхуулахад, Чингэлтэй дүүрэг нь 19 хороотойгоос 13 нь гэр хороолол. Гэсэн хэдий ч дүүргийн удирдлага авто замын бүтээн байгуулалтдаа анхаарч, гэр хорооллын олонх гудамжны авто замыг сайжруулжээ. Ингэхдээ зах, худалдааны төвтэй ойр гудамжнууд болон сургууль, цэцэрлэг орчмын авто замыг түлхүү сайжруулж, дүүргийн төсвийн хөрөнгө оруулалтаар арчилдаг болохыг тус дүүргийн ИТХ-ын төлөөлөгч О.Есөнтөмөр хэлсэн юм.
Эх сурвалж: Нийслэлийн ИТХ-ын ХМОНХТ
Холбоотой мэдээ
Сэтгэгдэл ( 0 )