Хорих ангид амиа алдсан Л.Бямбаа шүүгчийн хэргийг хаалаа

Авлигатай тэмцэх газрын Мөрдөн шалгах албанаас Салхитын мөнгөний ордын эзэмшигч нартай холбоотой хэргээр одоогоос долоон сарын өмнө буюу энэ оны хоёрдугаар сарын 20-ны өдөр хойшлуулшгүй ажиллагаа явуулж, нэр бүхий таван иргэнийг саатуулан баривчилсан байдаг. Тэдний дунд гавьяат хуульч Л.Бямбаа агсан байсан ба тухайн өдөр мөрдөн шалгах албаныхан талийгаачийн зуслангийн байр, гэр болон ажлын байр болох “Консент” хуулийн фирмийн оффист нэгжлэг явуулж, хэрэгт холбоотой нотлох баримтуудыг хураан авсан юм. Улмаар Л.Бямбааг эрүүгийн хоёр ч хэрэгт холбогдуулан, яллагдагчаар татаж 48 цаг ШШГЕГ-ын харьяа Цагдан хорих 461 дүгээр ангид хорьсон. Харин түүнийг суллах үед амралтын өдөр таарсан учир прокуророос яллагдагчийг суллах тогтоол үйлдэн, хорих ангиас гаргахаар очиход Л.Бямбаа амиа алдсан байсан юм.

Шалгалтын явцад талийгаач Л.Бямбаагийн үхэлд гадны нөлөө илрээгүй бөгөөд задлан шинжилгээгээр талийгаач эмэгтэй өөрийнхөө амь насыг хохироосон болох нь тогтоогдсон аж. Улмаар өнгөрөгч зургаадугаар сарын сүүлчээр түүний хэргийг хаах санал гаргаад байсан ба энэ хэрэг албан ёсоор хаагдсан гэдгийг эх сурвалж мэдээллээ.

Ийнхүү гавьяат шүүгчийн амь насаа алдсан явдал, олон жил маргаан дагуулсан Салхитын мөнгөний ордын эзэмшигч нарын хэрэгтэй холбогддог. Авлигатай тэмцэх газраас явуулж буй мөрдөн шалгалтын явцад дээрх хэрэгт Л.Бямбаа агснаас гадна хамжигч, хамтрагчаар оролцсон албан тушаалтнууд гарч ирсэн. Тодруулбал, Цагдаагийн ерөнхий газрын дэд дарга, Улаанбаатар хотын цагдаагийн газрын дарга асан Ч.Болдбаатар, Улсын Ерөнхий прокурорын  орлогч Г.Эрдэнэбат, талийгаач шүүгч Л.Бямбаагийн хүү С.Төмөрбат, Улсын Дээд шүүхийн шүүгч Г.Алтанчимэг, Ц.Амарсайхан, Д.Золзаяа, Г.Цагаанцоож, Д.Цолмон, Дүүргийн Иргэний хэргийн анхан шатны шүүгч Т.Энхжаргал нарын нэрс хамжигч нарын зураглалд байгаа юм.

Энэ хэрэгт холбоотой гэгдэж буй шүүгч нарын бүрэн эрхийг нь түдгэлзүүлэн шалгаж байгаа ба түүний дараа талийгаач Л.Бямбаагийн хүү С.Төмөрбат нь их хэмжээний бэлэн мөнгөтэйгөөр АНУ-ын хил дээр саатуулагдсан байдаг. Улмаар Авлигатай тэмцэх газраас С.Төмөрбатыг эх оронд нь авчрахаар хуулийн дагуу ажиллагаа явуулж байгаа ба хэргийн оролцогч нарыг шалгах ажиллагаа үргэлжилсээр байна.

Харин өнгөрөгч долоо хоногт Салхитын мөнгөний ордтой холбоотой хэргийг шалгах явцдаа бусдаас авлига авсан гэгдэх Шүүхийн шинжилгээний үндэсний хүрээлэнгийн хэлтсийн даргад Нийслэлийн прокуророос яллах дүгнэлт үйлдэж хэргийг Хан-Уул дүүргийн Эрүүгийн хэргийн анхан шатны шүүхэд шилжүүлээд байгаа юм.