Алга болсон “хий үзэгдэл” хөлөг онгоцыг олжээ

АНУ-ын хайгуулчид Миннесота мужийн газар нутагт орших Дээд нууранд 1901 онд алга болсон “Hudson” хөлөг онгоцыг олжээ. Орон нутгийн MRP News хэвлэлд мэдээлснээр, нутгийнхны дунд “хий үзэгдэл хөлөг” гэж алдаршсан тус хөлгийг энэ зун 250 метрийн гүнд илрүүлсэн ч сая л олон нийтэд зарлажээ.

Хөлөг онгоцыг гидролокаторын тусламжтайгаас олсон бөгөөд хожим судлаачид гэрэл зургийг авсан байна. Тэдний хэлснээр, 1888 онд бүтээгдсэн хөлөг онгоц ноцтой эвдрэл, гэмтэлгүй аж.

Маалинга, цагаан буудай ачсан “Hudson” хөлөг Дулут боомтоос 1901 оны есдүгээр сарын 15-ны өдөр гарч, хүчтэй шуурганы улмаас алга болсон байна. Дараах өдөр нь энэ нутгийн гэрэлт цамхгийн харуул нэгэн хөлөг онгоц живж буй харсан гэж ярьсан бөгөөд ослыг гэрчлэх нотлох баримтууд олдоогүй байна.

1901 оны есдүгээр сарын 20-ны өдөр нутгийн загасчид тус хөлгийн хэлтэрхий болон багийн зарим гишүүдийн цогцсыг олж байжээ. Гэвч хөлөг онгоц сүйрсэн газар, багийн бусад гишүүдийн хувь заяа хэрхсэн талаар өнөөг хүртэл нууц хэвээр үлджээ.

Олон арван жилийн турш нутгийн оршин суугчдын дунд “Hudson” хөлөг онгоц хий үзэгдэл мэт нууран дээр хөвдөг гэх яриа оршсоор байжээ.