Сүхбаатар дүүрэг АЖЛАА ХИЙНЭ ҮҮ, 100 айл хогондоо дарагдлаа

Сүхбаатар дүүргийн 10-р хороонд байрлах 100 айлын худалдаа эрхлэгчид ТВ8 телевизэд ханджээ.

Тэдний бараагаа татдаг хэсэгт байрладаг нийтийн байрны оршин суугчид угаадас, хогоо шөнийн цагаар үргэлж хаядаг талаар худалдаа эрхлэгчид ярив. Энэхүү асуудлаар Сүхбаатар дүүргийн мэргэжлийн хяналтын газарт хандсан ч өнөөдрийг хүртэл ямар нэгэн арга хэмжээ авч хэрэгжүүлээгүй байна гэлээ.

Уншигч та бүхний харж байгаа зураг Сүхбаатар дүүргийн 10-р хороо буюу 100 айл дахь худалдааны төвийн арын хэсэг юм. Энэхүү таван давхар нийтийн цагаан байрууд бүгд төвийн шугаманд холбогдоогүй 10 гаруй жилийн нүүрийг үзэж байгаа бөгөөд нийтийн байрны оршин суугчид хувинд бие засаж, бохир, угаадас, хогоо гадаа асгадаг. Эндхийн хогийн цэг хоёр өдөр ч болохгүй дүүрч, хальдаг талаар бухимдан ярьж байна. 

Гражийн хажууд байрлах хаалгаар худалдааны төвийн худалдаа эрхлэгчид бараагаа татаж авдаг гэнэ. 

Короновирусний халдвар, дэгдэлт өндөр байгаа үед бохир орчинд үйл ажиллагаа явуулах, агаар, орчныг ийм хэмжээний бохирдолтой байлгах нь буруу юм. 

Тус нийтийн байрны оршин суугчид төвийн шугаманд холбогдох хүсэлтэй байгаагаа Сүхбаатар дүүргийн Засаг дарга болон мэргэжлийн хяналтын байгууллагад олон удаа тавьсан ч бодит байдал өнөөдөр ийм байна. Иргэд ч, байрны оршин суугчид ч хохирч, халдвар, агаар дуслын өвчин тараах эрсдэлтэй болсон энэ орчин, нөхцөлд анхаарал хандуулахыг хүсэж байна. 
 

Бэлтгэсэн Э.ЭНЭРЭЛ (ТВ8 телевиз)