Үзэгчдийн зүрхний цохилтоор ХАМГИЙН АЙМААР аймшгийн киног тодруулжээ

Хэллоуин буюу сүнсний баярыг тохиолдуулан эрдэмтэд хамгийн аймаар аймшгийн киног тодруулжээ. “Forbes” сэтгүүлд мэдээлснээр, Их Британийн “BroadbandChoices” компанийн мэргэжилтнүүд нас насны 50 үзэгчийг судалгаанд хамруулж, зүрхний цохилтыг нь хэмжсэн байна.

Судалгааны хүрээнд кино шүүмжлэгчдээс өндөр үнэлгээ авсан нийт 120 цаг үргэлжлэх 50 аймшгийн кино үзүүлжээ. Ингэхдээ эрдэмтэд тэдний зүрхний цохилтыг хэмжиж байв. Судалгааны дүнгээр эрдэмтэд үзэгчдийн хамгийн хүчтэй айдас төрүүлсэн 35 киног тодруулжээ. Жагсаалтын нэгт найруулагч Скотт Дерриксоны “Sinister” /2012/ кино оржээ. Энэхүү аймшгийн кино үзэх явцад үзэгчдийн зүрхний цохилтын хурд дунджаар нэг минутад 86 байсан нь энгийн үеийн зүрхний цохилтын хурднаас 32 хувиар өндөр гарчээ. Тайван үед хүний зүрх дунджаар нэг минутад 65 удаа цохилдог байна. Киноны айдас төрүүлэм хэсэг гарах үер үзэгчдийн зүрхний цохилт нэг минутад 131 удаа цохилж, түргэсэж байжээ.

“BroadbandChoices” компанийн гаргасан жагсаалтын эхний тавд “Insidious” /2010/, “The Conjuring” /2013/, “Hereditary” /2018/, “Paranormal Activity” /2007/ аймшгийн кинонууд багтжээ.

Судалгааг 2020 оны есдүгээр сарын 15-наас 30-ны хооронд явуулжээ.