Нэг нь үрэгдэхэд нөгөөд нь өвлөгдөх ХАМТЫН ТЭТГЭВЭР

УИХ-ын гишүүн Б.Пүрэвдорж, А.Адъяасүрэн нар Хамтын тэтгэврийн тухай хуулийг санаачилжээ. Уг хуулийн төслийн гол санаа нь олон жил хамт амьдарсан гэр бүлийн хоёрын нэг нь нас барсан тохиолдолд тэтгэвэр нь өвлөгдөх юм. Ингэхдээ тэтгэвэр нь тодорхой хувь хэмжээгээр, үлдсэн гэр бүлийн гишүүний амьдрах хугацаанд нь өвлөгдөхөөр хуульчилжээ.

Өөрөөр хэлбэл, гэр бүл болж, 10-аас дээш жил амьдарсан, гэр бүлийн баталгаатай, дундаасаа үр хүүхэд төрүүлсэн байх зэрэг тодорхой шаардлагыг хангасан тохиолдолд тэтгэврийг нь өвлүүлэх боломжтой гэж хууль санаачлагчид үзсэн байна. 

Дээрх хуулийн төслийг УИХ-ын гишүүн Б.Пүрэвдорж, А.Адъяасүрэн нар өчигдөр /2021.03.22/ УИХ-ын дарга Г.Занданшатарт өргөн барилаа.  

Уг хуульд дараах хэд, хэдэн онцлог заалтыг шигтгэж өгчээ.

НЭГ
 

• Бусад улс орон төдийгүй манай улсад олон жил хамт амьдарсан нэг гэр бүлийн өндөр настнуудын нэг нь хорвоогийн мөнх бусыг үзүүлэхэд үлдэж байгаа ахмад нь цаг хугацааны хувьд удаан амьдарч чадахгүй байгаа статистик судалгаа байдаг аж. Энэ нь өрхийн амьжиргааны хэрэглээ буурах, ганцаардах, сэтгэл санааны уналтад орох, хөгшрөлтийн процесс хурдан явагдах зэрэг сөрөг байдлаар илэрдэг байна. Үүнээс сэргийлэх нэг зорилго нь хамтын тэтгэвэр юм.

ХОЁР
 

• Хамтын тэтгэврийн хууль үйлчилснээр цаашид тогтвортой гэр бүлийн тоо нэмэгдэх, гэр бүлийн гишүүдийн бие биеэ хайрлах, урт удаан хугацаанд хамт амьдрах, олон хүүхэд төрүүлж өсгөх, эрүүл мэнддээ анхаарах хандлага өснө.

Хамтын тэтгэврийн тухай хуулийн төслийг хэлэлцэн, баталснаар тэтгэврийн хуримтлалын тогтолцоонд сөргөөр нөлөөлөх байдал үүсэхгүй аж.  Гэхдээ хуулийн төслийг “Тэжээгчээ алдсаны тэтгэврийн тухай” хуультай адилтган ойлгож болохгүй. Ямартай ч парламентад АН-аас нэр дэвшин сонгогдсон УИХ-ын гишүүн Б.Пүрэвдорж, А.Адъяасүрэн Хамтын тэтгэврийн тухай хуулийн төслийг өргөн барилаа. Уг хуулийн төсөл парламентын босго давах эсэхийг харах л үлдлээ.