Э.Цэндбаатарын хэргийг Сүхбаатар дүүргийн цагдаагаас шалгаж байна

Монголын боксын холбооны бага хурал өчигдөр буюу есдүгээр сарын 5-нд Тусгаар тогтнолын ордонд болж, холбооны ерөнхийлөгчөө сонгосон тухай өмнө нь бид мэдээлсэн.

Тэгвэл тус хурлын дараа боксчид баяраа тэмдэглэж яваад зодоон үүсгэж, цагдаагийн байгууллагад хандсан байна.

Тодруулбал, боксчин Э.Цэндбаатар “Наран плаза”-ын “New york” ресторанд байхдаа боксчин Д.Идэрбатад зодуулсан гэх гомдлыг есдүгээр сарын 6-ны үүрийн 03.00 цагийн орчимд Сүхбаатар дүүрэг дэх цагдаагийн нэгдүгээр хэлтэст гаргаж, хэргийг шалгаж өгөхийг хүссэн байна.

Эргэн сануулахад, өнгөрөгч 2020 оны арванхоёрдугаар сард гудамжаар нүцгэн явж байгаа бичлэг тарж, түүнийг цагдаагийн байгууллагаас шалгаж байсан.

Тэрбээр энэ үйл явдлын тухай “Маш хүчтэй эм ууж байсан учраас би юу болсныг санахгүй байгаа. Болсон явдлын дараа сэтгэлээр их унасан. Итгэл хүлээлгэж байсан спорт сонирхогчдынхоо урмыг хугалсандаа маш их эмзэглэсэн. Хэдийгээр надад үгээр хэлэхийн аргагүй хэцүү байсан ч хүмүүсийн занг сайн таньж үлдсэн. Ойр дотны найз нөхөд, ах дүүс, ойр дотно явсан ах нар гээд хүндэлдэг хүмүүсийн хэн нь хэн бэ гэдгийг харсан. Алдааны дараа дэргэд үлдэх хүн цөөхөн байдаг юм билээ. Гэхдээ надад урдаа тавьсан зорилго байгаа учраас шантрахгүй, заавал амжилтад хүрнэ. Үүний төлөө л одоо би хичээнэ ээ” хэмээн  тайлбар өгч байсан юм.

Ярилцлагыг ЭНД дарж уншина уу.