Японы боксчин хүнд цохилтынн улмаас сар хагасын ой санамжаа алджээ

Өнгөрсөн долоо хоногт мэргэжлийн боксын хагас хөнгөн жингийн Дэлхийн аварга Брайан Нормантай Японы 23 настай Жин Сасаки тулаан хийсэн.

Япон тамирчин тавдугаар раундад нокаутад орохдоо дагзаараа савж унаад, хэсэг ухаан алдаж, ямар ч хөдөлгөөнгүй хэвтсэн тул дамнуурга дээр өргөн, рингнээс буулгасан юм.

Яаралтай тархины томографи хийлгэхэд цус хурсан юмуу гавлын яс цуурсан гэмтэл илрээгүй . Гэвч Жин Сасаки тэр хүнд цохилтоос өмнөх сар хагасын амьдралаа огт санахгүй байгаа ажээ.

“Дэлхийн аваргын төлөөх тулаан миний ялагдлаар дууссан. Би хүчээ шавхан тэмцсэн ч ялагдсандаа сэтгэл санаа их муу байна. Намайг дэмжихээр очсон, шууд эфирээр үзсэн хүмүүсээс уучлалт гуйя. Хагас хөнгөн жингийн Дэлхийн аварга болохоо харуулах гэсэн ч бүтээгүйд харамсаж байна.

Надтай тулаан хийсэн Дэлхийн аварга Брайан Норманд маш их баярлалаа. Хэдийгээр энэ тулаан миний амьдрал дахь хамгийн том бүтэлгүйтэл ч гэлээ их сургамж боллоо. Амьдрал дандаа амжилттай байна гэж юу байхав.

Тулааны төгсгөлийг давталтаар хараад, дамнуургаар аваад гарч буйг үзсэн. Би юу ч санахгүй байгаа юм. Сүүлийн сар хагасын амьдрал минь арилгасан мэт ой тойнд орж ирэхгүй байгаа. Тэр хэцүү үед олон хүн намайг дэмжиж буйгаа илэрхийлж, алга ташсан юм билээ. Түүнийг нь хараад сэтгэл их хөдөллөө. Харамсал, талархал хоёр зэрэгцэж байна. Намайг дэмжсэн та бүхэнд баярлалаа” гэж Жин Сасаки өгүүлжээ. Энэ бол Сасакигийн мэргэжлийн боксын рингэн дэх хоёр дахь ялагдал болсон.

Харин 28 тулаандаа нэг ч ялагдаагүй яваа Брайан Норман “Сайхан тулаан боллоо. Хүчтэй өрсөлдөгчтэй туллаа. Зүрх зоригтой сайн тамирчин гэдгийг нь бүгд харсан байх” хэмээн өгүүлжээ.