БНАСАУ Солонгосын хойгт дайн дууссан тухай тунхаглалыг эртэдсэн гэв

Пёньян Солонгосын хойгт дайн дууссан тухай тунхаглалыг эртэдсэн гэж үзэж байна гэж тус улсын гадаад хэргийн орлогч сайд Ли Тхэ Сон мэдэгджээ.

БНСУ-ын Ерөнхийлөгч Мүн Жэ Ин НҮБ-ын Ерөнхий ассамблейн 76-р чуулганы индрээс АНУ, БНХАУ-ын төлөөлөгчдийг байлцуулан Солонгосын хойгт дайн дууссан тухай зарлахыг санал болгосон юм.

Ли Тхэ Соны хэлснээр, дайн дууссан тухай бэлэг тэмдгийн шинжтэй тунхаглал АНУ-ын зүгээс Хойд Солонгосын талаар дайсагнасан байр сууриасаа татгалзахад хүргэнэ гэсэн баталгаа байхгүй. Мэдэгдэлд АНУ-ын тив алгасах баллистик пуужингийн туршилт, Япон болон Өмнөд Солонгост олон тэрбум ам.долларын зэвсэг худалдах, Австрали улсад цөмийн реактортай цөмийн шумбагч онгоц бүтээх технологи дамжуулах тухай АНУ-ын шийдвэр дурдагдсан. Энэ бүх баримт дайн дууссаныг тунхаглахад эрт буйг баталж байна гэж Ли Тхэ Сон онцолсон байна.

1950-1953 оны Солонгосын дайн зөвхөн эвлэрлийн тухай хэлэлцээр байгуулснаар төгссөн ба БНАСАУ-ын энхийн тухай гэрээ байгуулах дараа дараагийн оролдлогыг АНУ-ын зүгээс няцааж байжээ.

АНУ-ын Ерөнхийлөгч асан Доналд Трампын үед АНУ, БНАСАУ-ын дээд хэмжээний яриа хэлэлцээ болж, талууд дайныг албан ёсоор төгсгөхөд чиглэсэн  тохиролцоонд хүрч байсан билээ. Гэвч энэ тал дээр бодит үр дүнд хүрч чадаагүй юм.
Солонгосын дайнд АНУ-ын цэрэг НҮБ-ын туганд дор, БНАСАУ, Өмнөд Солонгосын зэвсэгт хүчин болон Хятадын ардын сайн дурынхны арми оролцжээ. Тухайн үед Өмнөд Солонгосын зүгээс эвлэрлийн тухай хэлэлцээрт гарын үсэг зурахаас татгалзаж байв.