Хүчний тэнцвэртэй байдал алдагдах нь дайнд хүргэнэ гэж мэдэгджээ

Солонгосын хойг болон түүний эргэн тойрны бүс нутагт хүчний тэнцвэртэй байдал алдагдах нь дайнд хүргэх учраас Бүгд Найрамдах Ардчилсан Солонгос Ард улс цөмийн зэвсгийн хүчин чадлаа бэхжүүлэх чиглэлийг тууштай баримтална гэж тус улсын удирдагч Ким Жон Уны дүү, Хөдөлмөрийн намын Төв Хорооны хэлтсийн орлогч эрхлэгч Ким Ё Жон мэдэгдсэн байна.

“Солонгосын хойг болон түүний эргэн тойрны бүс нутагт манай улс болон бидний дайснуудын хоорондох хүчний тэнцвэртэй байдал алдагдах л юм бол зайлшгүй дайнд хүргэнэ гэдэг нь үгүйсгэж болохгүй бодит байдал юм” гэж тэр тэмдэглэжээ.

АНУ, Япон, Өмнөд Солонгос арваннэгдүгээр сарын 3-нд сөнөөгч нисэх онгоцнууд болон B-1B стратегийн бөмбөгдөгч онгоц оролцуулсан цэргийн хамтарсан хээрийн сургууль хийж, оновчтой цохилтыг нэн даруй өгөх сургуулилт явуулсныг тэрээр сануулаад, энэ нь манай улсын дайснуудын түрэмгий санааг бодитой илэрхийлж буй хэрэг юм гэж мэдэгдсэн байна. Түүний үзэж байгаагаар, тогтоон барих цөмийн зэвсэгт батлан хамгаалах хүчнээ сайжруулан бэхжүүлэх БНАСАУ-ын бодлого нь өнөөгийн нөхцөлд цорын ганц оновчтой сонголт болоод байгаа ажээ.

БНАСАУ аравдугаар сарын 31-нд тив алгасагч нэн шинэ "Хвасон-19" баллистик пуужин туршсан ба алсын тусгал нь 15 мянган километрээс давах боломжтой юм байна.