Нөхөн сонгуулийн дүнг УИХ, ЕРӨНХИЙЛӨГЧИД өргөн барина

Б.Эрхэс | Zindaa.mn
2021 оны 10 сарын 18

УИХ-ын нөхөн сонгуулиар Хэнтий аймгийн 18 дугаар тойрогт Ц.Идэрбат, Сонгинохайрхан дүүргийн 28 дугаар тойрогт Э.Батшугар нар сонгогчдын олонхийн саналыг авч, УИХ-ын гишүүнээр сонгогдоод байна.

Хоёр тойрогт явагдсан нөхөн сонгуулийн дүнгийн талаар Сонгуулийн ерөнхий хорооноос өнөөдөр /2021.10.18/ мэдээлэл хийлээ.

Тэдний өгсөн мэдээллээр Сонгуулийн ерөнхий хороо хуралдаж, нөхөн сонгуульд МАН-аас нэр дэвшсэн Ц.Идэрбат, Э.Батшугар нарыг ялалт байгуулж, УИХ-ын гишүүнээр сонгогдсон тооцож, тогтоол гаргаж, үнэмлэхийг нь олгожээ.

Энэ талаар тус хорооны дарга П.Дэлгэрнаран "Сонгуулийн ерөнхий хороо өнөөдөр хуралдаж, сонгогчдын олонхийн саналыг авч, ялалт байгуулсан Хэнтий аймгийн 18 дугаар тойрогт Ц.Идэрбат, Сонгинохайрхан дүүргийн 28 дугаар тойрогт Э.Батшугар нарыг УИХ-ын гишүүнээр сонгогдсонд тооцож, тогтоол гаргалаа. УИХ-ын 18, 28 дугаар тойргийн нөхөн сонгуулийн ажил ирц хүрээгүйгээс болж нэмэлт санал хураалт явагдсан. Ирцийн хувьд өндөр биш ч гэсэн УИХ-ын сонгуулийн тухай хуульд зааснаар нөхөн сонгууль өндөрлөлөө. Хэнтий аймагт Ц.Идэрбат 17264 сонгогчийн саналыг авсан. Сонгинохайрхан дүүрэгт Э.Батшугар 28537 сонгогчийн саналыг авсан. УИХ болон Ерөнхийлөгчид нөхөн сонгуулийн дүнг өргөн барина" гэх мэдээллийг өглөө. 
 


ЭНХБАЯРЫН БАТШУГАР
 

Мэргэжил: Санхүүч, эдийн засагч

Төгссөн сургууль

  • АНУ-ын Бэнтлигийн их сургууль төгссөн (2004 он)

Ажилласан байдал

  • 2008 онд Америкийн “Жи Пи Морган” /JP Morgan/  хөрөнгө оруулалтын банкинд банкир
  • 2012-2016 онд Монголбанкны дэд ерөнхийлөгч
  • 2011-2012 онд МАХН-ын гадаад харилцааны нарийн бичиг, Гүйцэтгэх товчооны гишүүнээр сонгогдон ажилласан.


ЦАГААНХҮҮГИЙН ИДЭРБАТ
 

Мэргэжил: Англи хэлний багш, Төрийн удирдлагын менежер

Төгссөн сургууль
 

  • 1989 - 1998 онд Хэнтий аймгийн ерөнхий боловсролын 1-р сургуулийг төгсөж, бүрэн дунд боловсрол эзэмшсэн.
  • 1999 - 2003 онд Гадаад хэлний дээд сургуулийг Англи хэлний багш мэргэжлээр төгсөж, дээд боловсрол, бакалаврын зэрэг хамгаалсан. 
  • 2006 - 2007 онд Засгийн  газрын хэрэгжүүлэгч агентлаг Удирдлагын академид суралцаж, төрийн удирдлагын менежерээр төгссөн. 

Ажлын туршилга
 

  • 2003 - 2008 онд аймгийн МАН-ын хорооны улс төрийн ажилтан,
  • 2008 - 2012 онд Хэрлэн сумын Засаг даргын орлогч,
  • 2012 - 2016 онд аймгийн МАН-ын хорооны дэд дарга,
  • 2016 - 2020 Хэрлэн сумын Засаг дарга бөгөөд Чингис хотын захирагч,
  • 2008 оноос хойш Хэнтий аймгийн Иргэдийн Төлөөлөгчдийн Хуралд төлөөлөгч, тэргүүлэгч 
  • 2020 оноос Хэнтий аймгийн Засаг даргаар ажиллаж байгаа. 

Сэтгэгдэл ( 0 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Top