Сүүн замд нууцлаг объект илрүүлжээ

Австралийн эрдэмтэд Сүүн замд нэгэн нууцлаг гэрэлтдэг объект илрүүлжээ. Үүнээс өмнө орчлон ертөнцөд нэгэн зэрэг давтамжтай радио диапазонд энерги ялгарулдаг ийм зүйл илрүүлж байгаагүй гэнэ. Эрдэмтэд энэ нээлтээ “жихүүдэс төрүүлэм” гэжээ.

Сансрын биетийг анх Баруун Австралийн Кертиний их сургуулийн докторын зэрэг горилогч Тайрон О'Доэрти өөрийн боловсруулсан аргачлалын тусламжтай харсан байна. Биетийг 2020 оны сүүлээр илрүүлсэн ч судалгааны дүнг “Nature” сэтгүүлд саяхан нийтэлжээ. Эхэндээ эрдэмтэд О'Доэртигийн нээлтэд ач холбогдол өгөөгүй байна. Учир нь Сүүн замд энерги ялгаруулдаг сансрын биет таарах нь элбэг байдаг аж. Гэвч энэхүү нууцлаг объект нь 18 минут тутам нэг минут үргэлжлэх асар хүчтэй энерги ялгаруулдаг нь эрдэмтдийн анхаарлыг татжээ.

Олон цаг ажиглах явцад эл нууцлаг объект гэнэт алга болж, гэнэт гарч ирж байсан тухай Олон улсын радио одон орон судлалын төвийн (ICRAR) судлаач Наташа Харли-Уокер ярьжээ. “Энэ нь маш гэнэтийн бөгөөд жихүүдэс төрүүлэм байсан. Учир нь одон орон судлаачид хэзээ ч ийм зүйл урьд өмнө харж байгаагүй” гэж тэрбээр тайлбарлажээ.

Тус төвийн судлаач Жемма Андерсоны хэлснээр, тус объект нь бүхэл бүтэн нэг минутын турш энерги ялгаруулж байгаа нь ер бусын, гэнэтийн нээлт юм. Ийм зүйл байдаг гэж эрдэмтэд төсөөлж байгаагүйгээс гадна энэ үзэгдэл нь сансарт ямар нэгэн тайлагдаагүй физикийн үйл явц болж буйг гэрчилж  байна гэж Харли-Уокер онцолжээ.

Тус төвийн эрдэмтэд энэхүү объект нь Дэлхийгээс дөрвөн мянган гэрлийн жилийн зайд оршиж буйг тогтоосон байна. Маш тод биет асар хүчтэй соронзон оронтой гэнэ. Эрдэмтэд тус нээлт нь цорын ганц эсвэл урьд өмнө ажиглагдаж байгаагүй олон тооны ийм биет байдаг эсэх оньсогыг тайлахын тулд урт хугацааны судалгаа шаардлагатай гэж онцолжээ.