БНСУ ковидын талаар БНАСАУ-тай хэлэлцээ хийхээр зэхэж байна

БНСУ коронавирусний тархалттай тэмцэхэд нь Пёньянд тусламж үзүүлэх талаар  БНАСАУ-тай яриа хэлэлцээ хийх санал тавихаар төлөвлөж байна гэж Ёнхап агентлаг мэдээлжээ.

БНСУ-ын Засгийн газар энэ долоо хоногийн эхээр ажил хэргийн уулзалт зохион байгуулах тухай БНАСАУ-д албан ёсны санал тавих боломжийг идэвхтэй судалж байна гэж тус агентлагийн эх сурвалж онцолжээ.

Үүнээс өмнө БНСУ-ын Ерөнхийлөгчийн албан ёсны төлөөлөгч Кан Ин Сөүл Пёньянд коронавирусний эсрэг вакцин болон эмнэлгийн хэрэгсэл нийлүүлэх, эмч нар илгээхэд бэлэн хэмээн мэдэгдсэн билээ.

Энэ сарын 12-нд Солонгосын мэдээллийн төв агентлаг /KCNA/ тус улсад коронавирусний халдварын анхны тохиолдол бүртгэгдсэн тухай мэдээлсэн билээ. KCNA агентлагийн мэдээлснээр,  1349000 хүнд халуурах зэрэг шинж тэмдэг илэрч, 50 хүн эндээд байна.