СӨҮЛ | Пёньян цөмийн зэвсэг хэрэглэвэл Умардын дэглэмд төгсгөл ирнэ

БНАСАУ цөмийн зэвсэг хэрэглэвэл дэглэмд нь төгсгөл ирнэ гэж БНСУ-ын Ерөнхийлөгч Юн Сог Ёл мэдэгджээ.

Умард Солонгос цөмийн зэвсэг хэрэглэхийг завдсан тохиолдолд БНСУ-ын арми холбоотон АНУ-тай хамтран шийдвэртэй хариу барина. Тэр өдөр Умард Солонгосын дэглэмд төгсгөл ирнэ. Умардын дэглэм цөмийн зэвсэг өөрийг нь хамгаалж байна гэсэн төөрөгдлөөсөө салах хэрэгтэй. Вашингтоны тунхаг батлагдсанаар БНСУ, АНУ-ын холбоо цөмийн зэвсэг дээр суурилсан эвсэл болсон гэж Юн Сог Ёл мэдэгдээд БНСУ, АНУ, Японы гурван талт хамтын ажиллагааг бэхжүүлэхийн төлөө ажиллана хэмээн онцолжээ.

Аравдугаар сарын 1-нд албан ёсоор үйл ажиллагаагаа эхлүүлж байгаа БНСУ-ын стратегийн командлал Өмнөдийг БНАСАУ-ын цөмийн болон үй олноор хөнөөх бусад төрлийн зэвсгийн аюулаас хамгаалах гол нэгж болно. Тус командлал нь “Хёнму” баллистик пуужин, “F-35” сөнөөгч онгоц, баллистик пуужин бүхий шумбагч онгоц зэрэг зэвсэгтэй байх ба АНУ-ын Зэвсэгт хүчний цөмийн зэвсэг хариуцдаг стратегийн командлалтай нягт хамтран ажиллана гэж БНСУ-ын тэргүүн онцолсон байна.