Оюу Толгойн далд уурхайн нийт өртөг 200 сая ам.доллароор өсөж, 1.8 тэрбум болжээ

Канадын “Turquoise Hill Resources” пүрэв гарагт  Монгол дахь Оюу Толгойн томоохон зэс-алтны уурхайн өргөтгөлийн ажлын өртөг 200 сая ам.доллароор нэмэгдсэн талаар мэдээлжээ.

Гуравдугаар сарын сүүлчээр 3.4 тэрбум ам.доллар гэж тооцоолж байсан өргөтгөлийн ажил 3.6 тэрбум ам.доллар болж өсөөд байна.  Туркойз Хилл Оюу Толгойн гүний өргөтгөлийн шинэчилсэн өртөг болон хуваарьт КОВИД-19-тэй холбоотой  нэмэгдэл зардлын нөлөөлөл, холбогдох татварууд болон бусад бүтээн байгуулалт, тахал өвчинтэй холбоотой цаашдын менежментийн зардлын тооцоог тусгасан аж.

Ингэснээр төслийн нийт өртөг 7.06 тэрбум ам.долларт хүрч, 2015 оны анхны тооцооноос бараг 1.8 тэрбум ам.доллароор өсөөд байна. Туркойз Хилл  Оюу Толгойд эзэмшиж буй  өөрийн 51 хувийг уул уурхайн аварга Рио Тинтод худалдах эсэх талаар хэлэлцээ үргэлжилж байгаа билээ. Риогийн гүйцэтгэх захирал Якоб Стаушолм хэлэхдээ, худалдан авалт нь өмчийн бүтцийг хялбарчилж, компанийг улам бэхжүүлнэ гэж мэдэгдсэн.

Удаан хугацаанд сунжирсан гүний өргөтгөлийн ажлыг дуусгахаар Рио болон Монгол Улсын Засгийн газар тохиролцоонд хүрсний дараа Рио Тинтогийн зүгээс Туркойз Хиллд хувьцааг нь худалдаж авах санал тавьсан. Энэ хэлэлцээрээр Рио Монголын Засгийн газрын  бүтээн байгуулалтын зардалд ногдох хэсгийг санхүүжүүлэхэд ашигласан 2.4 тэрбум ам.долларын зээлийг  тэглэхийг зөвшөөрсөн юм. Харин Туркойз Хилл Рио Тинтогийн нэгж хувьцааг 34 канад ам.доллароор худалдан авах хүсэлтийг үргэлжлүүлэн хэлэлцэж байгаагаа мэдэгдсэн.

ГУРВАН ЖИЛИЙН СААТАЛ

Монгол Улсын нийслэл Улаанбаатараас өмнө зүгт 550 км зайд оршдог Оюу Толгойн өргөтгөлийн ажил удааширсан нь зардал хэтэрсэнтэй холбоотой. Тухайн үед энэ нөхцөл байдалд  Монголын Засгийн газар эгдүүцэж, уурхайн бүтээн байгуулалтын үндэс болсон 2009 оны хөрөнгө оруулалтын гэрээг цуцална гэж заналхийлж байсан. Эхний үйлдвэрлэлийг 2020 оны сүүлээр гаргахаар төлөвлөж байсан бол 2022 оны аравдугаар сард, 2023 оны эхний хагас болгон өөрчилсөн.

Оюу Толгой бол Рио Тинтогийн зэсийн гол төсөл юм. Гүний уурхай ашиглалтад орсны дараа буюу 2025 он гэхэд 560 мянган тонн хүртэлх зэс олборлох тооцоо бий. Ингэснээр  Оюу Толгой 2030 он гэхэд дэлхийн дөрөв дэх том зэсийн уурхай болохоор байгаа юм. Оюу Толгой ил уурхай, далд болон овоолгын хүдэр боловсруулснаар 2022 онд 110-150 мянган тонн зэс, 150-170 мянган унц баяжмал алт үйлдвэрлэх төлөвтэй байна.

Ц.ДАВААСАМБУУ

Эх сурвалж: Өглөөний сонин