Ши Жиньпинд тулгамдаж буй ГУРВАН БЭРХШЭЭЛ

Энэ оны сүүлээр Хятадын Коммунист намын ерөнхий нарийн бичгийн даргаар гурав дахь удаагаа сонгогдох  гэж байгаа Ши Жиньпин дотооддоо болон гадаадад ялалт байгуулж байгаагаа харуулахыг хүсэж байна. Тэрбээр гурав дахь бүрэн эрхийн хугацаагаа баталгаажуулснаар XXI зууны Хятадын шинэ Мао Зэдун хэмээх өргөмжлөл хүртэж магадгүй юм.

Ши Жиньпиний хувь заяа улам бүр ганхаж байна. Төлөөлөгчдийн танхимын дарга Нэнси Пелосигийн саяхан Тайваньд хийсэн айлчлал нь Хятадын арлын ардчилал болон түүний гадаад дэмжигчдийг айлган сүрдүүлэх оролдлогыг улам доройтуулж байна. Ши Жиньпинд  анхаарал хандуулах олон асуудал байсан ч хариу арга хэмжээ авахаас өөр аргагүйд хүрсэн. Хятадын Тайванийг тойрсон цэргийн сургуулилтыг Долоогийн бүлэг буруутгаад байгаа билээ. Хамгийн муу нь, Бээжин Пелосигийн айлчлалын хариуд уур амьсгалын өөрчлөлтийн асуудлаарх хамтын ажиллагаагаа зогсооно гэж сүрдүүлсэн нь Ши Жиньпин уг асуудалд чин сэтгэлээсээ хандаагүйг харуулж байна.

Энэ долоо хоног тус улсын хувьд гадаад бодлогын хувьд муу мэдээтэй байлаа.  НҮБ-ын боолчлолын орчин үеийн хэлбэрүүдийн асуудлаарх тусгай илтгэгч Хятад улс Уйгур хүмүүсийг албадан хөдөлмөрт ашиглаж байна гэж дүгнэх нь үндэслэлтэй гэж үзжээ. Энэ нь уйгурчуудын эсрэг геноцид хийсэн хэмээж буй нь АНУ-ын зохион бүтээсэн хуйвалдаан хэмээн няцаасаар ирсэн Ши Жиньпиний хувьд ихээхэн ичгүүртэй хэрэг юм.

НҮБ-ын мэдэгдэлд Бээжин санаа зовж буйг нотлон Хятадын ГХЯ-ны төлөөлөгч лхагва гарагт  "АНУ болон бусад барууны зарим орон  болон Хятадын эсрэг хүчнийхэн Шинжааны тухай худал мэдээлэл, ташаа мэдээлэлд итгэж, эрх мэдлээ урвуулан ашиглаж, тусгай ажиллагааны ёс зүйн дүрмийг бүдүүлгээр зөрчиж байна. Хятадыг гутаан доромжилж, Хятадын эсрэг хүчнүүдийг улс төрийн хэрэгсэл болгож байна. Тэдний төлөвлөгөө хэзээ ч бүтэхгүй” хэмээн мэдэгдсэн байна.

Түүнчлэн Хятад улс өчигдөр Оросын томоохон цэргийн сургуулилалтад оролцохоо зарласан нь Европт маргаан үүсгэх магадлалтай байна. Бээжин ийм сургуулилалтад  оролцохоор болсон нь  Украины эсрэг дайн явуулж буй Москвад улс төрийн дэмжлэг үзүүлж буй хэрэг юм.

Нөгөө талаас  Ши Жиньпиний гарын үсэг бүхий "Тэг-COVID" бодлого ихээхэн эрсдэлтэй байна. Хятадын Коммунист нам КОВИД-19-тэй хамт амьдарч сурахаас татгалзаж байгаад олон улсын бизнес эрхлэгчид бухимдаж байна. Гадаадын иргэд болон хятадуудын хувьд байнгын хөл хорио, үүнтэй холбоотой хоол хүнс, эм тарианы хомсдол нь улам газар авч байна. Уг дэглэмд ихээхэн анхаарал хандуулж байгаа хятадууд хөл хорио болон түүнийг хэрэгжүүлэгч намын албан тушаалтнуудыг эсэргүүцэх хүсэл улам бүр нэмэгдсээр байна. Намын цензурын легионууд эдгээр эсэргүүцлийн мэдээг таслан зогсоож чадсан ч намын "Бид ард түмэнд үйлчилдэг" гэсэн уриа, лоозон нь хүмүүсийн зүрх сэтгэлийг үргэлж байлдан дагуулдаггүй гэдгийг баталж байна.

Дараа нь эдийн засаг байна. Өсөлт удаашрал, олон улсын хөрөнгө оруулагчдын үл итгэлцэлд автсан Ши Жиньпингийн эдийн засаг хүндхэн салхитай нүүр тулж байна. Шинээр  төгсөгчдийн дунд ажилгүйдлийн түвшин нэмэгдэж байгаа нь боловсролтой, хүсэл эрмэлзэлтэй ангийнхны бухимдлыг нэмэгдүүлэх эрсдэлтэй бөгөөд энэ нь авторитар дэглэмийн хувьд сайн зүйл биш юм. Ши Жиньпин болон түүний орлогч Ли Көцян нар энэ долоо хоногт аж үйлдвэрт зочилж, эдийн засгийг дэмжих шинэ бүтээн байгуулалт хийхийг уриалж байна. Харин Ши Жиньпиний хэзээ ч  хийхгүй зүйл бол төвлөрсөн төлөвлөлт нь эдийн засгийн үр өгөөжийг хамгийн сайн авчирдаг гэсэн төөрөгдлөөсөө татгалзах  юм. Гэвч Хятадын хүн ам зүйн хямрал улам дордохын хэрээр тус намын өндөр өсөлт, бүтээмжийг тогтвортой байлгах эдийн засгийн хэрэгцээ улам бүр нэмэгдэх болно. Харамсалтай нь Ши-гийн хувьд энэ нь болохгүй байна.

Ц.ДАВААСАМБУУ