Ерөнхий сайдын "НОХОЙД БАРЬДАГ МОД"

Монгол Улсын Ерөнхий сайд Л.Оюун-Эрдэнийн Засгийн газрын нам дамнасан бүлэглэл, төрийн хулгайч нартай хийж байгаа улс төрийн "тэмцэл" үргэлжилж байгаа гэхэд болно. 

Тэрбээр "Би залуу хүн. Иргэдтэйгээ хамт тэмцэхийг хүсэж байна. Өнгөрсөн 30 жилийн алдаа завхралыг засахын төлөө хичээцгээе. Шударга ёсны төлөө Засгийн газар тууштай ажиллах болно. Шүүхийн байгууллагыг шахаж, шаардаж ажиллах болно" хэмээн төв талбайд цугласан олон мянган жагсагчдад хэлж байлаа. 

Үнэхээр ч эрх баригч намын дарга Л.Оюун-Эрдэнийн Засгийн газар өнгөрсөн нэг жил хүрэхгүй хугацаанд "Эрдэнэт" үйлдвэр, Хөтөлийн "Цемент шохой" болон "Дархан Төмөрлөгийн үйлдвэр" ТӨХК, "Эрдэнэс Тавантолгой" ХК, орон нутгийн "Тавантолгой" ХК-д хууль, хяналтын байгууллагын шалгалтыг оруулсан зэрэг олон ажлыг хийсэн.

Зарим тохиолдолд шаардлагатай гэж үзвэл Онцгой дэглэм тогтоож, Засгийн газрын Бүрэн эрхт төлөөлөгчийг хүртэл томилон ажиллуулсан байдаг.

Дээр нь, олон нийтийн анхаарлыг хамгийн ихээр татаж байгаа Хөгжлийн банк хийгээд нүүрсний хулгайн хэрэг байна.   

Энэ бүхэнд Ерөнхий сайд Л.Оюун-Эрдэнэд "нохойд барьдаг ганц мод" нь Хууль зүй, дотоод хэргийн сайд Х.Нямбаатар байж таарав. 

Хууль зүй, дотоод хэргийн сайд Х.Нямбаатарын хувьд ч Ажлын хэсгийг ахлахдаа ахалж, мэдээллийг ил тод, олон нийтэд хүргэж эхэлснээр хамаг галыг өөр дээрээ авсан байхыг үгүйсгэхгүй.  

Сүүлдээ бүр Х.Нямбаатаргүй юм байхаа ч болив. Тэр Төрийн ордонд хоёр УИХ-ын гишүүн хоорондоо маргалдаж зодолдсон ч, агсам согтуу тавьж танхайрсан ч хэв журам сахиулж байгаа харагдах боллоо.