Сирийн хөлбөмбөгчид, Туркийн бөхчүүд НУРАНГИД дарагджээ

Олон улсын олимпын хороо (ОУОХ)-ны Ерөнхийлөгч Томас Бах Турк, Сирид болсон хоёр удаагийн газар хөдлөлтийн улмаас олон хүн амиа алдсанд гүн эмгэнэл илэрхийллээ. 

Тэрбээр "Турк, Сирийн зүүн өмнөд бүс нутагт болсон газар хөдлөлтийн улмаас олон хүний амь эрсдэж, сүйрлийн улмаас их хэмжээний хохирол учирсанд маш их харамсаж байна. Хохирогчдын зарим нь залуу тамирчид байсан нь нөхцөл байдлыг бүр ч эмгэнэлтэй болгож байна. Гамшигт нэрвэгдсэн бүс нутагт спортын тэмцээнд оролцож байх үедээ амиа алдсан тамирчид болон хохирсон бүх хүмүүсийн ар гэрийнхэнд гүн эмгэнэл илэрхийлье. Олимпын гэр бүл Турк, Сирийн сэргээн босголтод бүх чадлаараа туслах болно” гэж мэдэгдэв.

Эх сурвалжуудын мэдээлж буйгаар цөөнгүй тамирчин газар хөдлөлтийн гамшигт нэрвэгдээд байна.

Сирийн шигшээ багийн төлөө 14 тоглолтод есөн гоол оруулж байсан хөлбөмбөгч Надер Жоухадар хүүгийн хамт нас баржээ. Туркийн хөлбөмбөгийн 1-р лигт тоглодог хаалгач Ахмет Туркаслан нуранги дор дарагдсан хэвээр байна. Мөн Туркт тоглож байсан Ираны гурав, Камеруны нэг хөлбөмбөгч нас барсан гэх мэдээлэл иржээ.

“Марасспор 1920” багийн хөлбөмбөгчид газар хөдлөлтийн улмаас сүйдсэн зочид буудалд байрлаж байсан гэх мэдээлэл бий. Мөн өсвөрийн тэмцээнд оролцож байсан волейболын 14 хүртэлх насны эрэгтэй, эмэгтэй багийн хүүхдүүд гамшигт нэрвэгдсэн байж болзошгүй хэмээн хэвлэлүүд мэдээлжээ. 

Чөлөөт бөхийн олимп, дэлхийн аварга Таха Акгуль нурангид дарагдсан чөлөөт бөхийн 30-40 тамирчныг гаргаж авахад тусламж хэрэгтэй байгаа тухай мөн бичсэн байна. 

Гамшигт сүйрлийн дараа Турк улсад спортын бүх төрлийн арга хэмжээг түр хугацаагаар зогсоогоод байна.