Украины дронууд “Starlink” сүлжээг ашиглах боломжгүй болжээ

АНУ-ын “SpaceX” компани Украины цэргийн дронуудыг удирдах зорилгоор “Starlink” хиймэл дагуулын холбоог ашиглахыг хязгаарлажээ.

Тус компанийн ерөнхийлөгч Гвинн Шотвеллын хэлснээр, “Starlink” сүлжээг зэвсэг болгон ашиглахын тулд хөгжүүлээгүй. “SpaceX” компани интернэтийн систем ашиглалтыг хязгаарлах технологио ашигласан гэж Шотвелл онцолжээ. Тэрбээр “Starlink” сүлжээг цэргийн зориулалтаар ашиглах тухай заалт Киев, “SpaceX” компанийн хооронд байгуулсан хэлэлцээрт тусгаагүй хэмээн тодруулсан байна.

2023 оны нэгдүгээр сарын 28-нд Украины Батлан хамгаалах яам цэргийн дроны худалдан авалтаа нэмэгдүүлнэ хэмээн мэдэгдсэн. Үүнд Киев 544 сая ам.доллар төсөвлөжээ. Үүнээс өмнө тус яам Украины армид дроны анги байгуулж, “Starlink” хиймэл дагуулын холбооны терминалаар хангах тухай мэдээлсэн билээ.