ГАЗАР ХӨДЛӨЛТ I Амиа алдсан хүний тоо 50 мянга давж магадгүй

Турк болон Сирид газар хөдлөлт болсноос хойш долоо хоног өнгөрөөд байгаа ч аврах албаны олон арван мянган алба хаагчид тэсгим хүйтнийг үл хайхран нуранги доороос амьд үлдсэн хүмүүсийг олж аврахын тулд эрэн хайх, аврах ажиллагаагаа үргэлжлүүлсээр байна. Байгалийн гамшгийн улмаас Турк болон Сири улсад амиа алдсан хүний тоо 34 мянга даваад байна.

Тухайлбал, сүүлийн мэдээллээр Туркт 29 мянга 605, Сирид 4574 хүн нас барсныг бүртгэжээ. Туркт бямба гарагт хүрэлцэн ирсэн НҮБ-ын хүмүүнлэгийн асуудал эрхэлсэн төлөөлөгчийн онцолсноор амь эрсэдсэн хүний тоо хоёр дахин нэмэгдэж болзошгүй байгаа аж. Сири улсад 5.3 сая хүн орон гэргүй болсон байж магадгүй бөгөөд Турк, Сирид хамгийн багадаа 870 мянган хүн халуун хоол идэх шаардлагатай байгааг НҮБ-аас анхааруулжээ.

Дэлхийн эрүүл мэндийн байгууллага 26 сая хүн газар хөдлөлтөд нэрвэгдсэн гэсэн тооцоог  танилцуулаад, эрүүл мэндийн тусламж дэмжлэг үзүүлэхэд 42.8 сая ам.долларын санхүүжилт нэн шаардлагатай байгааг мэдэгджээ. Газар хөдлөлтөөс амьд үлдсэн нэг сая гаруй иргэнийг түр орогнох байр руу шилжүүлснийг Турк улсын дэд Ерөнхийлөгч Фуат Октай мэдээлсэн байна. Мөн 200 мянган хүнийг Туркийн баруун хэсэг дэх газар хөдлөлтийн бүсээс шилжүүлжээ.

Гамшгаас амьд үлдсэн иргэдийг байрлах байраар хангах зорилгоор Туркийн их сургуулиуд энэ зун хүртэл цахимаар хичээллэхээр болжээ. Их сургуулиудын бүх дотуур байрыг орогнох байр болгон ашиглана гэж Турк улсын Ерөнхийлөгч Режеп Тайип Эрдоган мэдэгджээ. Түүнчлэн цэргийн усан онгоцнуудыг эмнэлгийн зорилгоор ашиглахаар шийдвэрлээд байгаа аж. Мөн тэрбээр гамшигт өртсөн 10 мужид дампуурал зарлах процессыг хоёр сарын хугацаатайгаар хойшлуулах тушаал гаргасан байна.

Үүнээс гадна Туркийн Засгийн газрын бодлого, авлига хээл хахуулийн улмаас барилгын стандарт зөрчигдөж байгааг албаныхан сүүлийн хэдэн жилд анхааруулсаар байсан аж. Турк улсын хуулийн байгууллагууд чанаргүй барилга барьсан аж ахуйн нэгжүүдийн албан тушаалтнуудыг баривчлах ажиллагааг эхлүүлсэн байна. Газар хөдлөлтөд нэрвэгдсэн 10 мужид чанаргүй барилга барьсан хэрэгт холбоотойгоор 131 сэжигтнийг шалгаж эхэлсэн бөгөөд тэднээс 113-ыг нь баривчлах шүүхийн шийдвэр гарсныг Туркийн дэд Ерөнхийлөгч мэдээллээ.

Тэдний олонх нь барилгын компанийнхан байгаа ажээ. Тухайлбал, “Үхлийн хотхон” гэж нэрлэгдээд буй “Ronesans Residence" 250 айлын орон сууц бүхий тансаг зэрэглэлийн хотхоныг барьсан барилгын компанийн захирлыг оргон зугтах гэж байхад нь Истанбулын онгоцны буудал дээр саатуулсныг орон нутгийн хэвлэлүүд мэдээлсэн байна. Гамшгийн бүс нутаг дахь 133 мянган барилгыг шалгахад 12 мянга гаруй нь нурсан буюу ноцтой гэмтсэн болохыг тогтоожээ. Хүйтний эрч чангарч байгаа нь тусламж хэрэгтэй байгаа олон сая хүмүүсийн зовлон зүдгүүрийг улам гүнзгийрүүлж байна. Туркийн Гамшгийн агентлагийн мэдээлснээр Туркийн байгууллагуудын 32 мянга гаруй хүн эрэн хайх, аврах ажилд оролцож байгаа гэнэ. Мөн олон улсын 8294 аврагч ажиллаж байна.

Ц.ДАВААСАМБУУ

Эх сурвалж: ӨГЛӨӨНИЙ СОНИН