Олимпын наадмын МАНДАТЫГ хэрхэн хуваарилдаг, ХЭН УРИГДДАГ вэ?

Олимпын наадмын мандатыг хэрхэн хуваарилдаг, ОУОХ-ны гишүүн Үндэсний холбоодын удирдлагууд олимпын наадамд хэрхэн оролцдог талаарх мэдээллийг хүргэе.

Олимпын наадмын мандат буюу Olympic Identity and Accreditation Card нь ОУОХ-оос батлагдсан тусгай журмын хүрээнд олгогддог, наадамд оролцогсдын хамгийн том бичиг баримт юм. Ингэхдээ тухайн улсаас эрх авсан тамирчдын тоотой уялдуулан албаны хүмүүсийн эрхийг олгодог.

Тухайн улсын албаны хүмүүст ноогдох мандатын тоо нь нийт эрх авсан тамирчдын 50%-тай тэнцүү байдаг. Энэ зарчмын дагуу Монгол улсаас 32 тамирчин эрх авч оролцож буй тул нийт 16 албаны хүн буюу team officials мандат олгогдсон болно. Үүнд МҮОХ-ны штабын ажилчид, шигшээ багийн дасгалжуулагчид, эмч, хөдөлгөөн засалч зэрэг бүх албан хаагчид хамаардаг.

Олимпын эрх авсан спорт холбоод нь дээрх журмыг үндэслэн нийт тамирчдын тооны 50%-д багтаан албаны хүмүүсийн жагсаалтаа гаргаж, мандатаа захиалдаг. Зарим спорт нь жингийн ялгаатай, мөн олон өдрийн турш үргэлжилдэг бол албаны хүмүүсийн мандатыг солигддог (transferable) байдлаар зохицуулдаг. Үүнтэй уялдуулан жүдо, чөлөөт бөх зэрэг спортын дасгалжуулагч, албаны төлөөлөгчдийн мандатыг төлөвлөсөн байна. 

Аливаа олимпын наадамд ОУОХ-ны гишүүн, Үндэсний олимпын хорооны ерөнхийлөгч, Ерөнхий нарийн бичгийн дарга, тэдгээрийн дагалдах зочид (гэр бүл) болон тухайн улсын багийн штабт ажиллах гишүүдийг албан ёсоор урьдаг. Энэ дагуу ОУОХ-ны гишүүн, МҮОХ-ны ерөнхийлөгч, Ерөнхий нарийн бичгийн дарга, тэдгээрийн дагалдах зочид (гэр бүл) болон МҮОХ-ноос Монголын багийн штабт ажиллах 3 ажилтныг ОУОХ-ноос урьж, олимпизмын соёл, Зохион байгуулах хорооны дүрмийн дагуу зардлыг бүрэн хариуцжээ. Энэ нь бусад бүх оронд адил тэгш үйлчилдэг олимпын албан ёсны үйл ажиллагаа юм.

ТӨВ ШТАБ ХЭДЭН ХҮНИЙ БҮРЭЛДЭХҮҮНТЭЙ АЖИЛЛАЖ БАЙГАА ВЭ?
 

МҮОХ-ны ерөнхийлөгч Б.Баттүшиг нь 2020 оноос хойш ОУОХ-ны гишүүнээр сонгогдон ажиллаж буй. Үүнтэй холбоотойгоор тэрээр энэ удаагийн наадамд зөвхөн МҮОХ-ны төв штабыг удирдан, чиг үүргээр хангахаас гадна ОУОХ-ны гишүүний хувиар үүргээ гүйцэтгэж ажиллаж байгаа болно.

МҮОХ нь Олимпын наадамд шигшээ багаа зохион байгуулж, оролцуулах үндсэн чиг үүрэгтэй. Энэ хүрээнд Тэргүүн дэд ерөнхийлөгч (Багийн ахлагч) болон Ерөнхий нарийн бичгийн даргыг оролцуулан, нийт 5 хүн төв штабт ажиллаж байна.

Энэ удаагийн Олимпын наадамд оролцож буй Монголын шигшээ багт Спортын анагаах ухаан, эрдэм шинжилгээний төвөөс эмч М.Булган, физиотерапист буюу хөдөлгөөн засалч Ч.Туул нар ажиллаж байна. Боксын шигшээ багийн бүрэлдэхүүнд Монгол улсын гавьяат эмч Ч.Насанбат багтсан.

Мөн БТСУХ-ны гурван төлөөлөгч шигшээ багийн үйл ажиллагааг зохион байгуулах, хяналт тавих чиг үүргийн хүрээнд тамирчдын тосгонд ажиллаж байна.

Тэрчлэн “NOC Guest” буюу ҮОХ-ны зочны мандат манай улсад хоёр ширхэг оногдсон бөгөөд МҮОХ-ны Гүйцэтгэх зөвлөлийн гишүүд Олимпын наадмын туршид гурав хуваагдан, уг мандатыг эзэмшин, ажил үүргээ гүйцэтгэж байгаа болно.