ШИЙДВЭР | Алдагдалтай ажиллаж буй ТӨК-иудыг “Эрдэнэс Монгол”, “Эрчэс Монгол”-д нэгтгэнэ

Засгийн газрын хуралдаанаар Төрийн өмчит болон орон нутгийн өмчит компанийн бүтээмж, ил тод байдал, засаглалыг сайжруулах хуулийн төслийг хэлэлцээд УИХ-д өргөн барихаар шийдвэрлэлээ.

Энэ талаар ЗГХЭГ-ын дарга Н.Учрал “Төрийн өмчит 122 компанийн мэдээллийг таван компани нэгтгэдэг. Нийт 51 компани нийлээд 380 тэрбум төгрөгийн орлого бүрдүүлдэг. Үлдсэн 41 компани 150 тэрбум төгрөгийн алдагдалтай ажиллаж байна. Тиймээс эдгээр компанийн статусыг тодорхой болгоно. Төрийн өмчит компани Баялгийн сан, төсөвт орлого төвлөрүүлэх үүрэгтэй. Хөрөнгийн менежмент хийдэг, засаглалыг сайжруулдаг компанитай нэгтгэнэ.

Засгийн газрын дэргэд уул уурхайн компаниудын нэгдэл буюу “Эрдэнэс Монгол”, уул уурхайн бус компаниудын нэгдэл буюу “Эрчэс Монгол” гэж байгуулна.

Харин яамдууд дээр байдаг улсын төсөвт үйлдвэрийн газар нэртэй, улс төрийн аж ахуйн тооцоот, төсвөөс санхүүждэг байгууллагуудыг шинээр зохион байгуулж, нийтийн үйлчилгээний байгууллага гэдэг статус руу шилжүүлнэ" гэлээ.