Ойн хоёр түймрийг унтраах ажиллагааг зохион байгуулж байна

Улсын хэмжээнд өнөөдөр (2026.05.06) 16:00 цагийн байдлаар Хөвсгөл аймгийн Эрдэнэбулган, Сэлэнгэ аймгийн Мандал суманд бүртгэгдсэн ойн 2 гал түймрийг унтраах ажиллагааг зохион байгуулж байна.

Түймрийг унтраах ажиллагаанд Онцгой байдлын байгууллага, мэргэжлийн ангийн нийт 96 хүн, 8 автомашинтайгаар оролцож байна.

Ихэнх нутгаар хуурайшилт ихтэй байгаа тул иргэд та бүхнийг ой, хээрийн бүсэд зорчихдоо галын аюулгүй байдлыг хангаж, халуун үнс нурмаа ил задгай асгахгүй байх, хог хаягдал, хашааны өнжмөл өвсийг шатаахгүй байхыг онцгойлон анхааруулж байна.