Сэлэнгэ аймгийн "Хар горхи" гэх газарт ой хээрийн түймэр гарчээ

Сэлэнгэ аймгийн Түшиг сумын Ганцат багийн "Хар горхи" гэх газарт ойн түймэр гарсан тухай дуудлагыг Онцгой байдлын байгууллага долоодугаар сарын 21-ний өдрийн 16:10 цагт хүлээн авчээ. Түймэр гарсан газар нь Хилийн цэргийн 0243 дугаар ангийн 3 дугаар заставаас хойд зүгт найман км, сумын төвөөс зүүн зүгт 80 км-ийн зайд аж.

Дуудлагын дагуу Сэлэнгэ аймгийн Онцгой байдлын газрын 36 дугаар анги, Цагааннуур сум дахь Эрэн хайх, аврах бүлэг, Хилийн цэргийн 0243 дугаар ангийн 3 дугаар заставын алба хаагчид, Түшиг сумын Засаг даргын Тамгын газрын ажилтнууд зэрэг нийт 25 хүн, дөрвөн автомашинтайгаар ойн түймрийг унтраахаар ажиллаж байгаа талаар Онцгой байдлын ерөнхий газраас мэдээллээ.