ТОО | Зэсийн экспорт нийт экспортын орлогын 44%-г бүрдүүлжээ

Он гарснаас хойш эхний найман сарын байдлаар экспортын орлогын 43.7% буюу 6.3 тэрбум ам.долларыг зэсийн хүдэр, баяжмалын экспорт бүрдүүлээд байна. Тайлант хугацаанд 74.4 сая тонн чулуун нуурс экспортолсон нь биет хэмжээгээр өмнөх оны мөн үеэс даруй 50 орчим хувиар өсжээ.

Тайлант хугацаанд Монгол Улсын гадаад худалдааны бараа эргэлт 22.8 тэрбум ам.доллар болж, өмнөх оны мөн үеэс 36.8% өссөн байна. Монгол Улсын нийт экспортын 92.5%-г БНХАУ-д нийлүүлсэн бол импортын бараа, бүтээгдэхүүний 40.7 хувийг Хятадаас, 27.5 хувийг ОХУ-аас импортолжээ.

Геополитикийн нөхцөл байдлаас шалтгаалан зэсийн ханш дээд амжилт тогтоолоо. Лондоны металлын бирж дээр зэсийн фьючерс ханш тонн тутамдаа 14.8 мянган ам.долларт хүрэн байна. Түүнчлэн Нью-Йоркын КОМЕКС бирж дээр зэсийн үнэ унц тутамдаа 6.89 ам.долларт хүрч мөн л түүхэн дээд амжилт тогтоогоод байна.