Обама “загасан-ерөнхийлөгчдийн” жагсаалтанд нэмэгдлээ

АНУ-ын амьтан судлаачид саяхан нээгдсэн нэгэн төрлийн загасанд улсынхаа ерөнхийлөгч Барак Обамагийн нэрийг хайрлажээ.

Etheostoma Obama хэмээх энэхүү загас нь жижигхэн биетэй бөгөөд ердөө л 5 сантиметр урттай, хайрс нь хөх, улбар шаргал өнгө хосолсон завсрын өнгөнүүдээс бүрдэх аж.

Урьд өмнийн түүхэнд энэхүү хүндэтгэлийг АНУ-ын экс-ерөнхийлөгчид Билл Клинтон, Джимми Картер, Теодор Рузвельт нар хүртэж байжээ. Мөн нэг төрлийн загас дэд ерөнхийлөгч асан Альберт Гороор нэрлэгдэх болсон аж.

Одоогийн төрийн тэргүүний нэрийг мөнхлөх оролдлого нэг бус удаа хийгдэж байжээ. Карибын тэнгис дэх Антилын арлуудын бүлэгт хамаарах Антигуа ба Барбуда улсын хамгийн өндөр цэг болох Богги уулыг Обамагийн нэрээр өөрчилж нэрлэсэн байна. Мөн Обамагийн нэртэй нэг гурилан бүтээгдэхүүн Румынд, янжуур Никарагуад байдаг аж.

Д.Мигаа