Хатан хаан Елизавета II 3D форматаар мэндчилнэ

Британийн хатан хаан Елизавета II-ын Зул сарын баярын уламжлалт мэндчилгээг энэ жил гурван хэмжээст форматаар үзүүлэх аж.

Хатан хааны мэндчилгээ өнгөрөх оны гол үйл явдлууд болох Лондонгийн Олимп, түүний төрийг жолоодсоны очир эрдэнийн ойд зориулагдах юм байна. Түүний мэндчилгээг Sky телекомпани эртнээс бичиж бэлджээ. Уг мэндчилгээ тусгай гурван хэмжээст телесувгаар дамжуулагдах ба түүнийг сүүлийн үеийн 3D функцтэй телевизороор үзэх боломжтой аж.

Зул сарын өмнөхөн хатан хаанд 3D тусгай нүдний шил бэлэглэжээ. Английн Queen \хатан хаан\ гэсэн үгийг илэрхийлэх Q үсгийн хэлбэртэй, Swarovski шигтгээгээр чимэглэгдсэн тэрхүү нүдний шилээ зүүсэн хатан хааны зургийг английн бүх сонинд нийтэлсэн байна.

Зул сарын баярын өмнө британичууд ойр дотныхондоо бэлэг авахаар дэлгүүр зорьцгоон, өнгөрөх амралтын өдрүүдэд гэхэд таван тэрбум фунт-стерлинг буюу найман тэрбум долларын гүйлгээ хийцгээжээ. Даваа гаригт зарим их дэлгүүр, худалдааны төвүүд бүтэн хоногоор ажилласан байна.

Зах зээл судлаачдын үзэж буйгаар, британийн хүүхдүүдийн хувьд зул сарын хамгийн нандин бэлэг нь планшет компьютер болж байна. Хүүхдийн тоглоом үйлдвэрлэгч фирмүүд түгшүүрт автжээ: Mattel компанийн хамгийн гүйлгээтэй бараа нь Барби хүүхэлдэй бус харин гар утасны зүүлт болсон байна.

Английн Зул сар энэ жил цасгүй болж байна. 12 сар гэхэд нэлээн дулаан байгаа ба сүүлийн өдрүүдэд агаарын температур нэмэх 14 градус хүртэл дээшилжээ. Цасны оронд аадар бороо орон, Англи ба Уэльсийн 160 районд үерийн аюул болох магадлалтай байна.

Зул сарын баяраар Елизавета хатан хааны үр ач нар нь түүн рүү ирж байгаа ба харин том ач хүү, ханхүү Уильям өөрийн эхнэр, Кембрижийн гүнж Кейтийн гэр бүлтэй хамт Зул сарыг тэмдэглэхээр болсон аж.

Д.Мигаа