АНУ Мали дахь францчуудад туслахаар болов

Мали улсад исламын дайчидтай тэмцэж буй Францын цэрэгт үзүүлэх тусламжийн хүрээгээ өргөжүүлэхээр АНУ шийдвэрлэлээ. Ялангуяа францын онгоцуудыг агаарт цэнэглэх, африкийн бусад орнуудаас Малид туслах цэргүүдийг зөөвөрлөхөд АНУ-ын нисэх хүчин туслахаар болж байна.

Францын зүгээс энэ чиглэлээр АНУ-аас тусламж хүссэн ба үүнийг гүйцэлдүүлэх нь хуулинд харшлах зүйлгүй хэмээн Пентагон үзэж байна. АНУ-ын Батлан хамгаалахын сайд Леон Панетта бямба гаригт францын коллеги Жан-Ив Ле Дриантай утсаар ярилцсаны дараа Пентагоны зүгээс дээрх шийдвэрийг мэдэгджээ.

Мөн Пентагоны тэргүүн Чад, Того зэрэг африкийн орнуудаас цэргүүд зөөвөрлөхдөө америкийн цэргийн онгоцуудыг ашиглахыг санал болгосон байна.

Д.Мигаа