Израилийн онгоцууд Сирийг бөмбөгдлөө

Израилийн цэргийн нисэх хүчний онгоцууд Дамаскийн ойролцоо цохилт өгчээ. Энэ талаар Сирийн улсын телевиз мэдээлсэн байна.

Тэдний гол бай нь нийслэлийн зүүн өмнө зүгт оршдог цэргийн эрдэм шинжилгээний төв байжээ. Урьдчилсан мэдээллээр, бөмбөгдөлтийн улмаас хоёр хүн амь үрэгдэн, нэлээн хэдэн хүн шархадсан аж. Лаборатори ихээхэн хэмжээний гарз хохирол амссан байна. 

Израилийн онгоцууд өглөө эрт үүрээр Хермон уулын хойд зүгээс маш доогуур нисэж орж ирсэн учраас радарт баригдаагүй аж.

“Жемрай дахь объектыг устгасан нь Сирийн тусгаар тогтнолыг зөрчсөн том гэмт хэрэг” хэмээн сирийн цэргийн удирдлага үзэж байна. Энэхүү халдлага нь Сирийн эсрэг террорист кампанит явууллагад Турк, Катарын адил Израиль мөн хамааралтайг гэрчилж байна хэмээн тэмдэглэжээ.

Д.Мигаа