“Transformers”-ийн гоо бүсгүй нууцаа ”цоожлох” дургүй

Холливудын секси эмэгтэй жүжигчдийн жагсаалтад дээгүүр ордог кино-од Меган Фокс “Transformers” киногоор нэрд гарсан билээ.

Меган Дениз Фокс 1986 оны тавдугаар сарын 16-нд Америкийн Теннеси мужид төрсөн ба гарал үүслийн дагуу ирланд, франц, индиан цусны холимог аж. Түүний эцэг нь тэнсэнгээр суллагдсан хоригдлуудын хянагч байсан ба Меганыг гурван настай байхад эцэг эх нь салжээ. Ээж нь удалгүй өөрөөсөө нэлээн ахмад нэгэн эртэй гэрлэн, тэд Флорида мужийн Порт-Сент-Лусид нүүн ирсэн байна. Хойд эцэг нь маш хатуу чанга дэг жаягтай хүн байсан бөгөөд энэхүү байдал нь Меганд хааяа илэрдэг, хяналтгүй, дүрсхийсэн авираар гадагшилдаг, олон улсын нэр томьёогоор “панический атак” гэж нэрлэгддэг нэгэн төрлийн сэтгэцийн өвчний үндэс болсон аж.

Таван настайдаа Меган бүжгээр хичээллэж эхлэн, жүжгийн дугуйланд явдаг болжээ. Анхны дүрүүдийн нэг нь 2001 онд “Holiday in the Sun” кинонд Олсены эгч дүү охидод тайван амьдрах боломж олгодоггүй, эсрэг дүрийн охин юм. Дараахан нь Флоридад хэд хэдэн кинонд зураг авахуулсан ба түүн дотор Майкл Бэйн “Bad Boys II” ордог аж.

Жилийн дараа Фокс ээжийн хамт Лос-Анжелест шилжин иржээ. 2003-2004 онд “Ocean Ave”, “What I Like About You”, “The Help” зэрэг кинонуудад зураг авахуулж, 2004 онд Линдсей Лохантай хамт “Confessions of a Teenage Drama Queen”-д тоглон, 2004-2006 онд “Hope & Faith” цувралд Сидни Шановскийн дүрийг бүтээсэн байна.

2007 онд Меган Фоксд жинхэнэ амжилт ирлээ. Тэрээр 2007 оны хамгийн дуулиант кино болох “Transformers”-д Микаэла Бейнсийн дүрийг бүтээсэн билээ. 2008 онд “How to Lose Friends & Alienate People”-д киноны мандаж буй одын дүрд тогложээ. 2009 онд “Transformers 2: Revenge of the Fallen” кинонд ахин Микаэла Бейнсийн дүрд тоглон, мөн “Jennifer’s Body”-д Женнифер Чекийн дүрийг бүтээв. 

“Transformers”-ийн гуравдугаар хэсэгт найруулагчтайгаа зөрчилдсөний улмаас Меган зураг авахуулахаас татгалзжээ. Зарим эх сурвалжийн мэдээллээр, Британийн The Telegraph-т Меган Фокс ярилцлага өгөхдөө “Трансформерсийн найруулагч Майкл Бей – жинхэнэ Гитлер” гэж хэлснээс болж уг киноны продюссер Стивен Спилберг Меганыг халсан гэж яригддаг бол Фоксын өөрийн нь өгүүлж буйгаар, Майкл Бейн харьцаа дэндүү тулган шаардсан шинжтэй байсны улмаас өөр төсөлд оролцохоор явсан гэжээ.  “Transformers”-ийн гуравдугаар хэсэгт Меганыг Британийн загвар өмсөгч Роузи Хантингтон-Уайтли орлон тоглосон байна.

2007 оны Трансформерст жийнсэн мини-банзалтай, биеэ хаах төдий задгай майктай, секси маягийн гоё галбиртай бүсгүй Шии ЛаБеф машины хөдөлгүүр дээр тонгойгоод зогсож байгаа үзэгдэл гардаг. Тухайн үед Автобот мэтийн шал өөр зүйл сонирхохоор ирсэн үзэгчид кино тараад буцах замдаа нөгөө мини-банзалтай бүсгүйн талаар яриа өрнүүлж байжээ.

Меган Фокс кинонд тоглохоос гадна янз бүрийн гоёмсог донжтой зургуудаараа сэтгүүлүүдийн нүүрийг чимэглэсээр байна. Тэрээр өөрийн нууцуудыг цоожтой хадгалаад байдаг хүмүүсийн нэг биш ба 2009 онд  «Wonderland» сэтгүүлд өгсөн ярилцлагадаа шизофренитэй төстэй шинж тэмдгүүд өөрт нь илэрдэг талаар ярин, 1962 онд амиа егүүтгэсэн, өөрийн шүтээн Мэрилин Монро шиг юм тохиолдох вий хэмээн айдаг тухайгаа өгүүлжээ.

Гэр бүлийн хувьд, 2010 оны зургаадугаар сарын 29-нөөс хойш Брайан Остин Грийнтэй гэр бүл ба хосууд 2012 оны есдүгээр сарын 27-нд Ноа Шэннон Грин хэмээх хүүтэй болсон билээ.

Холливудын оддод түгээмэл үзэгддэг шивээс Меганд найм байдаг:

• гэдэсний баруун доод хэсэгт “Брайан Остин Грин”
• баруун гарын бугуйны дээхэн Мэрилин Монрогийн хөрөг байсныг 2011 онд арилгасан
• баруун мөрний ар хэсэгт Шекспирийн “Лир ван”-гаас ишлэсэн “We will all laugh at gilded butterflies” гэсэн үгс
• зүүн бугуйн дээр хоёр давалгааны зураг
• биеийн зүүн талд “There once was a little girl who never knew love until a boy broke her HEART” бичиг
• баруун хөлийн шагайны дээхэн таван хошуу од ба хавирган сарны зураг \энэ нь ганц өнгөт шивээс нь\
• хүзүүний ар талд хүч тамирын билэг тэмдгийн дүрслэл
• биеийн хажуу бөөрөн дээр Микки Руркад зориулсан “Those who danced were thought to be insane by those who could not hear the music “ бичээс байдаг аж.

Амьдралын бусад сонин баримтуудаас дурдахад, 1999 онд Өмнөд Каролинад зохиогдсон American Modeling and Talent Convention in Hilton Head америк бүжгийн шоунаас нэлээн хэдэн шагнал хүртсэн байна. Мөн Motorola компанийн рекламанд тоглохдоо орлон тоглогчийн хуруунууд шаардагджээ. Учир нь, Меган Фоксын гарын хуруунууд төрөлхийн удам дамжсан согогтой ба жүжигчин бүсгүйн эрхий хуруунууд хэтэрхий богинохон аж.

Д.Мягмарсүрэн